現年51的江美儀自1992年拍廣告出道，從演30多年先後效力亞視和TVB，早前終憑台慶劇《下流上車族》榮膺視后，當時在台上哭成淚人的她坦言：「我以為我唔係親生女唔會攞到呢個獎架！」曾表示「亞視人低人一等」的江美儀如今人氣反彈，她日前接受《星光路上》訪問時，大談從演心路歷程，其間更重提被公司雪藏的往事。
【點擊睇江美儀訪問相、梁洛施近照】：
節目中，江美儀重提2013年憑《衝上雲霄II》奪最佳女配角後，因太氣焰而犯眾憎兼被雪藏一事，她說：「嗰時入TVB冇耐就攞女配角，就覺得『我得架喇，呢啲嘢太簡單，以前喺舊公司都係做呢啲嚸架啦』，而家睇番係有啲驕傲嘅氣焰、幾乞人憎嘅態度出咗嚟，當時我自己係唔知嘅，直至一啲事發生，我冇嘢做……」據悉，2017年劇集《親親我好媽》首播，首次擔大旗的江美儀傳拍攝時因不滿劇本，趁戲劇製作總經理曾勵珍（珍姐）放大假期間，越級向當時仍是助理總經理杜之克投訴珍姐下屬《親》劇監製關永忠，搞到停廠兼令關永忠「被辭職」，因而辣㷫珍姐，江美儀即時被雪。對此，江美儀憶述：「雖然當年《親親我好媽》收視好好，但我發放咗好多負能量畀其他同事，因為嗰時覺得自己做女主角就一定攞到獎，但其實呢個世界唔係咁，亦唔可以咁樣諗。」
近年信佛茹素的江美儀坦言，疫情間工作停滯令她反思不少，認為「一定要有正能量畀人」，故拍攝《下》時積極發放正能量，最終劇集贏盡收視和口碑，她續道：「喺呢行而家有嘢做已經好難得，仲要遇到咁好劇本、角色、團隊，你仲想點呀？所以我同自己講冇獎攞都賺咗，我從來都冇諗過自己可以攞女主角，反而個天就畀你。」提到得獎一刻，江美儀望向台下同樣亞視出身的陳煒說：「我哋好爭氣呀！」原來騷前她與陳煒互相勉勵時已眼濕濕，江美儀爆料：「喺廠外行紅地氈時，我同陳煒講無論今晚邊個攞，我哋都爭番啖氣，根住我哋唔知點解好感動，喺出面喊呀。」二人識於微時，江美儀稱見證對方默默向上爬絕對不容易，雙方也互戥大家開心。
對於獲看似「大纜扯唔埋」的梁洛施祝賀封后，江美儀即大爆二人由「網友」到學佛結緣的經過，她坦承跟梁洛施才相識不久：「之前訪談節目《單對單》拍攝我去打坐、修佛，有日喺社交平台收到梁洛施嘅私訊，佢好話好想跟我學佛，問我可唔可以帶佢去，我即刻問人個Account係真定假，之後我就約佢見個面先。」此後，江美儀便帶梁洛施去打坐及跑山，她又謂：「佢而家好犀利，全素唔食蒜唔食蔥。」另外，江美儀還於訪問中感謝伯樂鄭則仕、劉松仁的教導，令她演技層次昇華獲益良多。
【其他文章】：
周星馳親寫揮春贈20有緣人 「湖南佬」囝囝現身引關注 陳百祥表演神鳥鳳凰回禮
湯洛雯晒巨鑽訂婚戒去「鐵馬家族」團拜 唐詩詠無影似再避馬國明攜眷同場
張明偉賀歲處男作同阿媽打對台？張媽媽曾任職教育局 氣質高雅靚樣曝光
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
