栢天男（Adam）、林小湛、郭秀雲、苑瓊丹及江芷妮等今晚（30日）到圓方出席《毒舌大狀》演藝貴賓特別場。Adam 指最近除了忙謝票外，亦專誠來捧戲中外母小湛姐場，對於《毒舌大狀》上映10日票房已破5,500萬，他指劇本寫得好之餘，亦非常感激香港觀眾支持，雖然Adam在戲中飾演大反派，但他就謂做演員不要理角色好或壞，只要投入去做就好。
提到若票房再高會否有表示，栢天男指開Live時會盡量滿足觀眾，問到會否穿泳褲，他笑說：「呢個好似阿Dee（何啟華），佢話着泳褲，（會唔會騷肌？）Live時有要求的話，到時再睇吓，其實開心嘅，10日內去到5,500萬好犀利，而且口碑好好，不過都仲好需要大家支持。」林小湛則透露明天將會飛往加拿大一個月探家人：「3年冇返去，好掛住佢哋，今次係我個仔同女買機票。」小湛姐指返港後會開拍杜琪峯的新戲及接拍兩部大陸電影，問到現年82歲的她會否覺得太忙？她想也不想就說：「唔會，越忙越好，冇嘢拍就覺得好攰，（家人有沒有投訴？）佢哋好支持我，2019年我喺加拿大攞咗最佳女配角，當時我79歲，啲人問我幾時退休，我就話我會一直做戲做到100歲。」Adam指今次在小湛姐身上學到了做甚麼也好，做演員最需要的是禮貌和品格。
【點擊睇《毒舌大狀》特別場靚相】：
吳若希（Jinny）與老公何兆鴻（Alex）亦有現身特別場，Jinny到場後即表示今日是老公37歲生日正日，所以帶對方來見世面，又笑言最重要是免費：「佢本身都好想睇呢套戲，由過年講到今日，終於可以實現佢嘅生日願望。」Jinny指因小朋友証件問題，故新年留在香港度過，但亦興奮地指年初三到了澳門工作，為今年開了一個好的頭：「好開心，久違嘅一個出埠工作，同埋再去澳門嘅感覺好奇妙，覺得好似所有嘢都變咗，但個氣氛好彩仲喺度。」
問到Jinny兔年是否想生多個？她聽後即耍手兼擰頭說：「唔好啦，千祈唔好生多個，我今年一定要好專心工作，因為我睇完師傅，師傅話我今年工作上係會幾好，同埋係可以發達嘅！」她透露昨日已收到消息，落實稍後將會到美國洛杉磯開演唱會，之後就預計會到大陸舉行巡迴，再加上早前拍的劇集又會出街，故今年將會是她工作上非常好的一年，至於是否因這個原因而暫時不想生小朋友，Jinny說：「唔係唔生住，係呢一世都唔想再生，兩個夠晒數！」
【其他閱讀】：
「食屎陳師奶」遭同事學生朋友質疑 孫慧蓮：係名之嘛，我唔做壞事咪得囉！
郭政鴻激罕晒與兩女兒合照顏值超高 曾因戀滕麗名被冠上「渣男」之名
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
