星8卦｜「潮女」慳家換「長輩級」形象指導 為細路唔介意成身土味
所謂近朱者赤，「潮女」以前同「俊男」拍拖嗰陣，因為「潮男」好捨得買衫，衣著打扮合時宜，順帶影響潮女都身光頸靚。
「潮男」又教女友唔識打扮唔緊要，駛啲錢搵人幫手，仲借埋衫唔駛自己諗，後嚟因為「潮男」唔想結婚，「潮女」又恨生仔，三扒兩撥式搵咗「白領」即刻結婚仲三年抱兩。
白領無乜本事，「潮女」就當借種，成頭家自己養起晒，北上密密食，搵搵埋埋真係唔少嘢。但搵多咗唔代表捨得駛，「潮女」竟然嫌之前嘅形象指導貴，本嚟駛100蚊，依家就聽「潮媽」話，用埋同一個形象指導，只係用20蚊，覺得好抵，連「潮媽」都用得，自己慳一截直情化算啦！
問題係「潮媽」幾十歲，佢扮潮啲人哋覺得與時並進，但細成30年嘅「潮女」，交俾老人家指導負責，就一個娘字同out字。唔怪得呢幾年「潮女」無乜名牌上身，反而多咗鄉巴村姑味，初時仲以為佢北上耐咗受感染，原來為咗慳家換人搞形象。都話一分錢一分貨，有啲嘢平就未必好。不過「潮女」做咗阿媽心態都變晒，話情願留啲錢俾啲細路，自己娘唔娘，係見仁見智喎，媽媽真偉大！
【相關文章】：
星8卦｜模範夫妻爆離婚！小雲出軌發姣派帽 吉仔用成副身家箍煲
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
