鄭秀文（Sammi）、陸駿光及《流水落花》導演賈勝楓等昨晚（13日）到觀塘一間戲院為電影謝票，一眾觀眾看到Sammi後表現得非常興奮，期間更有女Fans大叫「我愛你鄭秀文！」而導演則表示要藉着情人節前夕多謝兩個女人，一個是幫他寫劇本的編劇兼老婆羅金翡，而另一個則是為電影寫出「流水落花」四個字的女兒，離場後一眾Fans亦湧到場外圍觀。
Sammi與陸駿光接受訪問時，提到最近港產片大收，問到對票房是否有期望，Sammi就表示不敢，因她拍這部電影得到的東西已遠超自己的想像，故票房方面會交給觀眾和上天，自己會輕鬆面對。對於黃子華主演的《毒舌大狀》已超過9,000萬，Sammi說：「真係神級票房！都戥佢開心，而家嘅觀眾都願意入場，亦有自由選擇同取向，最近都多咗好多新導演，我都入咗戲院睇咗好多部，每部電影都各有特色同風格，《流水落花》亦有另一種風格。」問到陸駿光若票房好是否會像阿Dee（何啟華）般除褲慶祝？Sammi即建議對方除眼鏡，而陸駿光則表示隨時可以，他希望能用好票房來報答導演，皆因他認為導演可以找一個更有名氣的人來演出，在旁的Sammi即說：「但你更適合，適合重於名氣！」
【點擊睇《流水落花》謝票靚相】：
提到Sammi憑此戲提名金像獎影后，她表示很開心，也很珍惜這個感覺：「提名唔係容易嘅事，入到五強內心好感恩，至於攞獎就唔敢諗。（因為對手係張艾嘉？）佢得我當然戥佢開心，我今朝先同佢短訊，佢俾咗好多鼓勵我，我哋唔係競爭對手，我哋係好朋友。（張姐係宿敵？）我從來都唔覺係敵人，佢係我嘅學習對象，我舊年同佢拍咗一部電影，我好欣賞佢嘅演技同內心嘅風度。」若能得到影后是否會覺得圓滿？Sammi說：「我唔敢諗，我慣咗落敗，都第10次提名，繼續交天，都感激自己嘅努力，冇放棄到演戲路線，經過不停努力同嘗試，永遠唔放棄有進步嘅機會，到咗而家呢步，電影評論學會頒咗個獎俾我認可我嘅演出，呢個係我花咗10幾年先行到呢一步。」
而陸駿光則對沒有提名不感失望，又自爆在金像獎舉行當晚，本已買了機票與太太去旅行，現在就要改期支持Sammi，問到Sammi當晚會否拖著老公許志安行紅地氈，她說：「我次次都單拖，我鍾意着得靚靚單拖，唔使有人拖。（點解唔帶安仔出嚟分享你嘅喜悅？）年年都冇，多數都冇，慣性唔會例外，（拖你可能會攞！）一講到奬就唔諗喇，（安仔冇要求出席？）梗係冇，佢個性唔係咁。」明天情人節，問Sammi會如何慶祝？她說：「梗係食吓嘢，因為我15號要飛，要去其他地方幾日，有包薯片我就得，冇特別慶祝，如常咁過，開心平安就得。」提到黃心穎在情人節出新歌，Sammi就表示沒留意，問到身為樂壇天后的她有什麼說話寄語給對方？她說：「你講嘅我完全唔知，所以答你唔到！」
【其他文章】：
譚詠麟晒43年前深邃五官美男子照 曾被批唔夠Man：生得白淨啲就係女人型？
黃心穎復出昔日好姊妹湯洛雯一舉動「贈興」 出新歌前夕原來係舊愛馬國明生日
7位經歷醜聞復出女星丨TVB小花偷食人夫獲男友原諒再受力捧 港姐出軌產女轉戰抖音市場
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
