獨家丨郭富城「雙失」詐型導演翁子光《風再起時》投資2億中港票房齊仆

翁子光執導，兩大影帝梁朝偉及郭富城主演的《風再起時》，利用四大探長說殖民時期的香港歴史，堪稱史詩級製作，上映前一直被高度關注，導演講到明用「有今生冇來世」的方法拍攝，是一場義無反顧的冒險。可惜在內地上映29日，票房僅得4,889萬人民幣，香港上映17日，1000萬票房都冇，宣傳做足但仍無起色，導演在社交平台上載新馬仔拎乞衣兜相求觀眾入場。據知因為《踏血尋梅》好信任翁導的城城非常失望，失落金像獎影帝提名之餘，更令他想成為票房保證之路延長。翁導自己都唔好受，有記者致電問料，心情甚差的他大發脾氣，「你唔可以直接搵我囉。」撰文:金泰亨

城城想做香港票房保證，近年一反常態狂接戲，排隊上映嘅就有《掃毒3人在天涯》、《臨時械劫》、《內幕》及《無名指》。

翁子光諗住電影有兩大影帝孭飛，又賣香港情懷，香港人應該會好捧場。

兩人首度合作，郭富城扮演磊樂，梁朝偉飾演南江。

名模杜鵑周旋偉仔及城城之間。

電影集合金像及金馬級演員。

內地網民超MEAN

電影花了3年製作，再等3年先可以上映，投資2億，加上兩大影帝孭飛，導演執導的2015年作品《踏血尋梅》又曾橫掃7個金像獎獎項，點秤都冇得輸，全世界都寄予厚望，不過，內地上映後評價極差，影評網留言極之刻薄，有內地網民以諧音「依托答辯」（一坨大便）批評電影，焫㷫翁子光，表示受到侮辱的他在微博發表長達2000字文章反擊。

豆瓣網的電影評價好差。

翁導就係睇到此內地網民留言深感侮辱寫千字文反擊。

呢位內地觀眾話睇到笑出聲。

內地電影評價麻麻，咁公道啲講，內地人唔熟香港情懷，睇唔明又唔可以怪套戲嘅。

翁子光在微博寫下千字文反擊。

千字文

內地票房仆直死因
《風再起時》表面是拍六七十年代香港四大探長的故事，其實以整個香港社會的發展為主軸，由四十年代日本侵華之前講起，總之在兩個半小時內講四十幾年的香港人及事，再加上談情說愛及連場歌舞，內地觀眾以為可以睇到雙雄火爆對決的商業動作港產片，原來係講香港情懷的言情歷史電影，即係文藝片，缺乏香港情懷的內地觀眾當然媽聲四起。據知，翁導度好故仔後向城城力Sell，後者覺得故仔太另類冇信心，「得唔得㗎?」但翁導知道城城想做票房保證，搵埋梁朝偉做雙主角氹掂佢。知情人士表示，「套戲之前少少咁上，上到夠場數先可以參加金像獎，有影評人睇完，大讚有FEEL，梁朝偉加翁子光等於王家衛，翁子光當時都覺得係，佢呢鑊好雄心壯志㗎。」

口罩令取消，翁導即在社交平台上載新馬仔拎乞衣兜相求觀眾入場。

翁導為谷票房,出PO叫觀眾睇兩次套戲。

因為內地影評極差，翁導於電影在港上映前寫千字文，希望香港觀眾畀機會套戲。

導演真係好鍾意寫千字文。

一有時間就搞謝票場。

導演配搭唔同演員。

開謝票場有助票房，城城亦努力參與。

青雲冇突破有提名
眼見內地票房差，香港票房亦冇眼睇，城城詐晒型，知情人士爆料，「城城好信翁子光，但出到嚟無提名，票房又差，佢好想做票房保證，最重要劉青雲同黃秋生只係安於本份都有提名，仲要佢大女剛出世都要返內地拍戲，犧牲好多。」另一資深電影人亦指翁導計錯數，「佢諗住偉仔FOR大陸，城城FOR香港，可能佢拍完《踏血尋梅》心雄咗，覺得觀眾會接受佢更多，根本《風再起時》考驗觀眾接受能力，佢太睇得起觀眾嘅包容，睇票房就證明佢實驗唔成功。」電影投資2億，偉仔同城城片酬已佔1億，目前中港票房夾埋6千萬都冇，肯定蝕大本，難怪有傳媒致電問料換來翁導發脾氣回應，「你唔可以直接搵我囉。」