3月23日，大致多雲，短暫時間有陽光，天氣潮濕溫暖。美國聯儲局一如預期加息0.25%，本來市場係收貨，加上聯儲局喺最新嘅經濟及貨幣政策「點陣圖」中，預測今年內僅再加息0.25%，美股升得好地地之際，鮑爺忽然喺記者會放鷹，表示如有必要，會加息至比預期更高水平之餘，仲話減息唔喺聯儲局預期嘅基本情景之中，即係今年內都未必會減息，市場本來憧憬今年減息希望幻滅，美股急轉直下，再加埋財長耶媽表示，唔打算保障全部存款，銀行股急跌，道指喺一粒鐘之內由高位回2.8%，三大指數終告倒跌收市，跌幅超過1%。

本來加息0.25%係市場所接受，誰知鮑爺喺記者會上無啦啦放鷹，而周二美股回升，係憧憬政府為所有存款包底，銀行信心危機有望終結，市場信心改善，豈料耶媽一盤冰水照頭淋，除咗承諾為銀行提供更多流動性之外，係唔會擔保所有存款。佢呢一番說話，又引來淡友空軍沽爆中小型銀行股，FRC跳水15%，又係擺明畀人夾硬做低個股價，引發市場信心危機。值得留意係，今次出現擠提嘅中小型銀行，全部都係上咗市嘅，反而無上市嘅中小型銀行未見出事，反映今次嘅擠提風暴，係因為股價暴跌再有傳聞銀行唔掂，即係股價插水令銀行被擠提而出現流動性問題，而非銀行本身有流動性問題。若然如此，噚日古天后提到非常時期，要用非常手段，只要暫停金融股沽空，淡友軍空無得透過沽空銀行股搵食，咁問題自然解決。不過基於政治考慮，而華爾街一向對美國政府有強勁影響力，邊有政府中人夠膽提出呢個非常建議。只要空軍不斷重施故技，向上市中小型銀行埋手，呢個信心危機真係沒完沒了。

至於港股呢邊，噚日跟隨美股反彈，成功修復10日及100日線，下一個目標自然係20日同250日線，大約係19800-19900水平，不過噚日成交額連1100億都無，港股缺乏資金流入嘅問題仍然存在。即使阿爺已降準放水，無奈未見資金流入中港股市，講到底，內地喺過去一年，樓股皆跌，疫情封城亦令生意人損失慘重，基本上仲邊有閒錢可投入股市，就連A股都自顧不下，北水參與港股亦只係小打小鬧，短線炒賣，走得快，好世界。無資金肯作中長線投資，繼續得一注錢塘水滾塘魚，港股已進入有波幅，冇升幅嘅悶局之中。總之大市未能企穩250日線，重上20000水平，港股都係反覆，未能走出困局，反而要留意美國銀行業風暴能否結束，若然三日唔埋兩日，又有中小型銀行爆鑊，美股難捱，港股亦難有好日子過。