香港國際機場今(19日)凌晨發生驚險車禍！網上流出事發時車CＡＭ片段，見到一名七人車男司機在機場停車場登上自己的座駕後，七人車突開行，司機整個人跌出車外，被七人車輾過雙腳，七人車繼續加速衝前，直至撞倒前面的鐵柱方告停下，司機伏在地上動彈不得，但仍有知覺，有網民直呼「恐怖」，估計有關司機「冇熄車」，停車時無入P波，兼踏錯油門致「自炒」釀禍。
車ＣＡＭ片段紀錄時間為今日凌晨零時22分，為時僅19秒，地點為機場1號停車場。片段開初見一部掛上中港車牌的白色七人車停在車場路邊，一名穿白T恤男子緩緩由車後行上司機位開門登車，４秒後見七人車開行，但司機卻跌出車外，碌到地上，雙腳遭後胎輾過，七人車繼續向前衝約5米，撞向鐵圍欄車身彈起始停，而伏在地上的司機動彈不得，曾抬頭望向座駕，之後便沒有郁動，直至片末。
有網民睇片後直言「有啲恐怖」，「好恐怖呀，佢隻手同個身好似比車車到曲左（咗）…」更多網民好奇「點做到」，有人奇怪「個人跌咗出嚟，架車仲加速緊，自動導航㗎？」、「好奇怪， 佢都跌咗落地喇，架車仲加速衝前？」有人估計「冇熄車，冇入P波，踏錯油門！」有網民提醒「都話離開車輛前要熄匙」、「好彩前面冇人，架大巴幫手頂住，唔係一路沖（衝）⋯」
正當網民擔心跌出車外的司機情況如何，有否嚴重受傷，事件發展卻出人意表。警方表示，今（19日)零時32分，一名姓鍾（52歲)男子將七人車停在機場1號停車場，其間他上車時撞到波棍，七人車溜前撞柱，他自己則跌出車外，他沒有受傷，毋須送院，由於撞毀鐵柱，鍾稱會與職員商討解決方案，案件列作交通意外無人受傷，結局認真出人意表。
---
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
