機會，總是留給有準備的人。
楊偉倫（阿卵）與麥沛東（麥東），為電影《正義迴廊》的角色，分別準備了十三年及六年，才等到一鳴驚人的機會。電影叫好叫座，更榮獲本屆香港電影金像獎十六項提名，而兩位男主角，則同時角逐「影帝」。
四十歲的楊偉倫坦言：「我冇估到自己有份提名，因為今年好多戲，又好多勁嘅演員，我覺得麥東會有嘅（提名），但我就抆啲，因為我哋同一部戲⋯⋯但一齊提名，真係好神奇！」
三十三歲的麥沛東就表示：「謝票嘅時候都有講，如果我哋可以一齊提名『男主角』，喺同一個格入面，其實真係好夢幻！」
二人一同提名，感覺依然夢幻，他們一唱一和，麥沛東一句：「我喺演藝學院讀書嘅時候，真係冇諗過自己可以同黃秋生、劉青雲，競逐同一個獎項，發夢都冇諗過可以行紅地氈。」
楊偉倫即笑謔：「自己買就得，啲紅地氈，浴室前面嗰張。」麥沛東接話：「我屋企嗰張灰色嘅。」
撇除賽果，敗給劉青雲的二人，其實有提名已當贏咗，換上認真Mode，楊偉倫稱：「我做演員，唔係發明星夢，係純粹因為覺得好玩，好玩嘅地方係，我好似有一個空間，投入去另一個世界咁，好過癮。」
除了好玩，麥沛東稱：「好多人第一次睇我嘅演出，就係《正義迴廊》，所以多咗機會同知名度，對我嚟講，係一個起步。」
他們解鎖的，不只是一同提名的成就，還有繼續追夢的空間。
第一次
《正義迴廊》是楊偉倫和麥沛東第一次擔正的電影，二人憑演出，一同獲提名角逐今屆香港電影金像獎「最佳男主角」，雖然結果敗予《神探大戰》的劉青雲，但二人反而大談跟這位前輩的合作。
楊偉倫笑言：「啱啱我仲同青雲哥做緊戲，真係冇諗過可以同佢競逐同一個獎，好神奇！」麥沛東則滿臉「葡萄」：「羨慕你囉！我都同佢（青雲）拍過，但係佢拍完先至到我，我淨係可以同佢影張相，冇得同佢拍⋯⋯之前好似話，佢訪問讚我呀，好開心！」
他們擔演的《正義迴廊》改編自真人真事，二人分別飾演弒父殺母的逆子，及看似智力稍低的幫兇，角色充滿挑戰性，令兩位科班出身的演員，投入以外，也被角色影響。
楊偉倫表示：「拍嘅時候，係有啲影響嘅，因為個角色諗嘢、做人嘅方向好Sad，令我喺嗰段時間 有一種低沉嘅心情。
「但係我又冇諗點樣去抽離，因為我哋知道自己係工作緊，拍完又會做其他工作，投入另一個世界。而我同麥東本身都係比較Positive嘅，所以角色冇想像中影響咁大。」
麥沛東回答前，冷不防阿卵一句：「佢智力真係降低咗。」他一笑接話：「o依家日子耐咗，提升番。」
為部戲，他特別增了四十磅，所以他坦言：「當時我對食物係冇乜慾望，一得閒我就食，瞓覺前又啪雪糕又飲可樂，基本上冇停過，仲辛苦過減肥。」
