「歌神」張學友有得天獨厚的好聲線，歌唱技巧也受絕大多數人認同，早年傳有內地歌唱選秀節目，有意請他出任導師，本是理所當然，但有指製作單位即使開出高達九位數即過億港元的豐厚酬勞，仍然未能打動他。昨晚（22日）張學友應邀在TVB節目《馬時亨‧香港情》出任首集嘉賓，終於首度公開原因，他在節目中更大爆曾有意移民，甚至已到加拿大領使館商談。
【相關閱讀】：張學友60+巡唱香港歌迷要等到下年 重溫36年前開騷感觸落淚：似拚命三郎
【點擊睇張學友訪問內容】：
張學友在節目中被另一嘉賓張文新問到為何他成為歌手一炮而紅後，會轉向電影方面發展，張學友直言是「被迫」的。他透露最初幾張唱片大賣超過20萬張後，到第四張唱片開始進入迷失期，他直言：「當時好多十首歌之中，佢哋（唱片公司）目標只有一首或兩首，其他就係濫竽充數。我覺得基本上係一個致死原因。最後觀眾咪唔聽你囉。」他透露這張《昨夜夢魂中》的銷量最終只得兩萬五千張，他說：「呢個世界邊有咁多神仙，係咪呀？其餘八首唔得你就玩完啦，一張唔得兩張唔得。」當時他身為家庭經濟支柱，正當徬徨之際剛好有人找他拍電影，就順理成章踏入了電影圈，甚至稱「有人搵我拍戲，我就咩都接」。
雖然舞台經驗豐富，而且甚少有瑕疵，但他竟透露自己原來有舞台恐懼，更大爆連另一天王巨星張國榮也有同樣問題，他說：「有次喺頒獎典禮後台，我同張國榮先生一齊出場，佢喺後面係震晒嘅，我諗冇人會相信，我都唔相信佢會驚，但佢真係震晒，佢問我：『學友，出面啲觀眾係點㗎？』，你哋係唔會知道我哋好多時都係好驚。」
其後又談及張學友拒當導師的傳言，他竟謙稱自己不懂教，並說：「第一，因為我唔識教。我比賽出身，知道比賽好唔容易。每一個有膽量上台唱歌嘅人，唔係專業歌手，但喺咁多人面前唱歌，已經好犀利，所以我實在唔忍心去講：『你呢樣唔好嗰樣唔得。』」至於第二個原因，張學友則指自己並非受正統的音樂學校及專業歌唱訓練，所以不知道該怎教人。不過，他仍相當支持大家勇敢去追夢、參加比賽，亦不反對別人當導師，「只係我冇本事去做。」
到節目尾聲，馬時亨問張學友覺得香港有什麼好的地方，張學友就自爆原來很早之前已有意移民，他說：「因為我喺香港出世，喺呢度大，我喺香港得到我嘅一切。我唔可以控制下一代點諗，因為每個人經歷唔同。講真，今日，其實唔好講今日，我二三十年前已經講過，移民新加坡……移民加拿大啦，考慮咗好耐。有一次我上到去加拿大領事館，當時話魁北克省最易，去到坐喺度一諗，我以後面對都係外國人，嗰一下心情又頂唔順，又走咗。我諗我本身係裙腳仔啦，喺邊度就留喺邊度，呢個係對嗰個地方嘅感情。」
【其他文章】：
73歲翁倩玉客串日劇近照曝光 演全裸男主角祖母年輕模樣極凍齡
方媛低調晒逾63萬首飾闢謠 私藏大量名牌極盡奢華 證郭富城絕不小器孤寒
北京電影節｜卓韻芝宣佈離婚首現身甜笑挨遊學修膊頭 70歲李修賢激罕露面眉毛變白
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
