秀茂坪順利邨今日發生一宗家庭糾紛案，一名中年漢疑抑鬱症發在家中大吵大鬧，揚言「要同一對仔女一鑊熟」，其後更持雙刀架頸挾持幼女，幸警察及時到場將他制服，阻止一場倫常慘劇發生。本網事後接觸到事主的妻子伍太，她哭訴丈夫無業逾十年，一直對一對仔女打打鬧鬧，令二人留下不能磨滅的陰影，一家人本來打算以和為貴，可以大事化小，無奈丈夫今日病發，持刀傷害一對仔女，令她決心搬離單位，希望與一對仔女重過新生活，「以前都係打打鬧鬧，今次居然拎刀，有人問我點解個仔夠膽報警，如果唔報警，我個仔就死咗喺廁所入面，再唔搬全家就玩完」。
相關新聞：有片｜聲稱要同仔女一鑊熟 秀茂坪中年漢持雙刀架頸挾持幼女 警破門射胡椒水槍制服
伍太提起今日丈夫的所作所為，雙眼通紅，其間更難忍淚水數度落淚。她指丈夫多年前在郵局任職散工，後來弄傷腰骨需要停工休息，自此開始胡思亂想並患上抑鬱症。多年來，她一直身兼夫職外出工作賺錢養家，無怨無悔，希望一家安好，又會定時陪同丈夫覆診，希望他的病情能夠好轉。
伍太憶述今日外出上班時丈夫沒有異樣，惟至中午近12時，接到兒子的求救短訊，聲稱父親突然手持兩把刀挾持胞妹，揚言「要同一對仔女一鑊熟」，嚇得她立即從工作地點跑回家了解。她透露當時兒子躲在廁所報警，而丈夫竟用利刀意圖劈開廁所門，「佢呃個仔出嚟，個仔唔夠膽，我打電話畀佢（丈夫）同佢講，你要個仔出嚟唔係問題，你要放低所有利器，等我個仔行出嚟，你先入去，但佢又唔肯，個仔都唔夠膽出嚟，直到啲警察入咗屋，同我個仔講：『你爸爸俾我哋拉咗喇』，我個仔先肯出嚟」。
她指以往丈夫都會對一對仔女打打鬧鬧，其中對大仔更甚，令二人留下不能磨滅的陰影，「其實睇佢個人無乜嘢，但我同佢溝通唔到，成日打個仔打得好犀利，所以搞到個仔陰影好大，之前諗住算啦，唔好搞咁多嘢，始終爆開件事出嚟，對一對仔女的成長影響好大」。她指現時希望向社工求助向房署申請調遷，與一對仔女重過新生活，「如果繼續再住落去，全家真係會玩完」。
被問到丈夫為何今日會病發，伍太百思不得其解，估計與近兩個月沒有支付家用有關，「平日都係我養家，但呢兩個月有好多洗費，所以先無畀佢，呢幾日佢同個女講：『快啲問你阿媽攞錢』，唔知係咪因為咁」。
房署發言人表示，就有關個案，房屋署暫未接獲調遷申請，會與社會福利署緊密聯絡，為戶主提供適切協助。房屋署亦留意到有關單位大門於昨日事件中受損，現正為住戶安排緊急維修。
---
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料: https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
