辣妹有個威猛老豆 搞到才華被埋沒無運行
「辣妹」如果唔係因為有個咁硬嘢嘅老豆，佢參加歌唱比賽應該贏到開巷，唔使好似依家咁鬱鬱不得志。大家唔係好想畀「純情」跑出，明知結果會好似依家咁，水靜鵝飛，因為「純情」嘅實力係表面風光，反而輸家「辣妹」自細受訓練，天份唔夠都磨練到好見得人，加上佢份人認真又有啲天份，放棄香港嘅一切去流浪，食過唔少咸苦，份人都幾踏實。
可惜人真係無得揀老豆老母，之所以佢有本錢由細到大都做自己想做嘅嘢，都係因為有個夠惡嘅老豆「大哥」。
有名你叫，「大哥」唔止係一個地方巴閉，佢名下好多唔正當嘅生意，半條街嘅細路跟佢搵食，照計呢啲人出身，又點會生到個咁有才華嘅下一代，偏偏「辣妹」完全唔想同「大哥」有太深嘅聯繫，可能細細個出走都係避免太扯上關係。
今次真係俾「大哥」連累架，主辦方點都要check下所有參賽者嘅背景，「大哥」嘅事蹟江湖中無人不知，主辦方怕麻煩自然要令「辣妹」低調啲，連上位都撳住，搞到「辣妹」無晒心機，但又唔可以出聲，費事老豆「大哥」發癲搞到大家仲更加收唔到科，「辣妹」唯有離港衝出去至有運行，唔係啲才華就一世被埋沒咗！
【相關文章】：
星8卦丨「賊公」「賊婆」勢利靠「純情」上位後唔識人凑掂鮮肉繼續呃
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
