「多情種」阿叔3個情婦打崩頭 閃人自保繼續做溝女王
呢排「多情種」阿叔是非多多，縱容身邊人亂咁晒冷，搞到好多人係背後笑到佢面黃。你咪睇佢唔靚仔又生得細粒，但氹女真係有一手。後生佢追到個靚老婆，但又唔知足，喺出面有三廠四廠，甚至五廠。「多情種」最本事係街頭收埋一個，街尾包養一個，老婆係街中間彼此都唔知大家存在。
話說有一次，「多情種」如常咁去跑場搵食，殊不知幾個女人知道佢喺嗰個地方，以為畀啲驚喜自己嘅男人，約都無咁齊各自坐一張枱捧場。由於大家唔知對方嘅存在，初時都相安無事，衰在其中一位四廠突然跳出嚟送花又挨身挨勢，搞到場面好尷尬，仲要令二廠同三廠即刻發現呢個女人同自己嘅男人有瞹昩，一齊衝出嚟同四廠開晒拖。
於是一秒鐘內大家明白晒彼此係邊位，三個女人唔係善男信女，即刻互相先起口角，繼而動武，打到杯碟橫飛。「多情種」阿叔一見勢色唔對，即刻偷偷地走人，由後門閃咗，毛髮絲毫無損。最抵死佢即刻離開香港，換埋電話，等啲女人完全搵佢唔到。男人多情，又享受畀人爭，所以「多情種」一直玩得好過癮！
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
