獨家丨周吉佩助情緒病歌迷重生感動爆喊興奮自爆結束7年夫妻分房瞓局面

36歲周吉佩（吉吉）獲《中年好聲音》冠軍後人氣急升，生活出現重大變化，「吉s粉」(Fans暱稱)激增5倍。日前吉吉兌現有幸得獎就請食飯承諾，自掏腰包柯打到會和近百位歌迷會會員慶祝，期間感動落淚。事業有起色之餘，他跟落選港姐太太黃彥欣亦已同牀「合體」，結束7年多分房瞓局面，更開心自爆：「夫妻關係有昇華。」採訪：方騫平

吉吉兌現有幸得獎就請食飯承諾，被現場Fans熱情感動到喊。

吉吉好激動，喊到耳仔都紅晒。

周吉佩成名得來不易，更珍惜「吉s粉」對他愛戴。

周吉佩和近百位歌迷會會員食飯慶祝。

周吉佩最近工作停不了，但仍忙中偷閒跟「吉s粉」慶功：「當晚冇請食鮑魚，但食泰菜都好好味㗎，希望過多一段時間我有更大嘅進步，攞到更好嘅成績，到時再請大家食好啲啦。(咁下次係咪食鮑魚呀？)我真係唔敢應承住，怕開大咗個頭收唔到科呀。」

吉吉自掏腰包柯打泰菜到會，下次成績更好時再食好啲。

幫助Fans搵到奮鬥目標

吉吉最意外歌迷會成立短短個多月人數激增，由4月中只得20人參與首次聚會，𠵱家會員近百，年齡層由5歲到50幾歲，當中有跟足他15年的忠粉：「見到咁多人支持自己，真係好感動，一直以嚟希望以歌會友，今日終於做到，佢哋係我嘅動力。」而最令吉吉感動是可以幫到患病Fans，「有食情緒藥多年嘅Fans DM我，佢15年前買咗我唱片，但一直放喺櫃桶，直至見到我參賽，被我追夢故事打動，激發佢搵到奮鬥動力，情緒病不藥而癒，呢件事令我好鼓舞，冇諗過自己有能力用生命影響生命！」

吉吉好𠱁到姨姨fans歡心。

台上跟女歌迷一齊跳舞。

5歲小朋友都like吉吉。

吉吉能以歌會友。

發表冧妻宣言無人取代

歌迷會活動上Fans為吉吉訂製吉字蛋糕，現場又播放他唱《留給世上我最愛的人》的參賽片段，台下不少人感動落淚，當然包括主角。當晚除大合唱外，吉吉又演繹15年前處男歌《家教》，由於歌曲講述爸爸對他的教導，做了爸爸的吉吉，重新演繹感受更大。另外跟Fans跳唱《跳舞街》掀起全場高潮：「連孻仔Jasper都興奮到清唱兩句，老婆又同班Fans玩埋一份。」對於多咗女Fans，吉吉強調老婆唔會呷醋：「成立到歌迷會要多謝吉太，佢負責同Fans溝通，Fans鍾意佢多過我。」他又發表冧妻宣言：「我人生所有嘢交晒畀吉太管理，佢係我心目中No 1女神，無人可以取代！」

太太黃彥欣及一對子女現身撐場，用行動全力支持。

吉吉歌迷會成員愈來愈多。

歌迷聚會變身簽名會。

老婆唔介意女Fans埋身。

吉吉受男男女女歡迎。

迷姐近距離接觸吉吉笑到卡卡聲。

老婆怪佢爆晒家事出嚟

吉吉成為大忙人，他坦言老婆有啲唔開心，「我哋連一齊食飯嘅時間都冇，不過佢掛住我多咗。」對於之前投訴自大女Imogen出世返家第一日，老婆要陪小朋友瞓，將他被鋪掉去細房要求分房瞓，經他狂呻後問題已得到改善，最近一對子女已搬入細房，兩公婆終能「合體」：「其實係要時間嚟說服孻仔，𠵱家佢5歲，大個仔肯自己瞓。以前兩公婆會為分房瞓而鬧交，不過知道太太好錫小朋友，互相遷就唔會怪佢，佢反而責怪我乜都講晒畀人聽，但佢聽返訪問，又話我講得幾好笑，唔介意我坦白，坦誠係我哋溝通方式。」最後吉吉笑說：「分房7年，𠵱家兩公婆同牀反而有啲唔慣，因為自己反瞓，成日嘈醒吉太，哈！但佢就好鍾意我啲鼻鼾聲，話好有安全感喎。」忙到天昏地暗，吉吉笑說同牀都冇氣冇力製造「小吉吉」