「阿妹」受盡情傷 揀啱「純品」托終身重新出發
女人揀老公最緊要帶眼，揀啱唔易架。好似「阿妹」自細都係屋企嘅皇帝女，雖然話唔憂嫁，但最弊一直要揀出名又靚仔嘅對象，通常係恨你嘅身家，又或者靚仔無本心，出面好多女人，你都咪諗自己係唯一一個。
話說佢同「好仔」一齊嗰陣，出埋錢畀人做生意，自己就愛到失晒魂，對方成日若即若離，搞到幻得幻失，雖然有知情人士話「好仔」深心處係鍾意男仔，「阿妹」可以被公開，係因為背景猛有助仕途，當年又後生真係好索，姑且同佢一齊玩下試下，點知「阿妹」太認真，成日想結婚生仔，結果梗係分手收場。
呢次「阿妹」真係好傷，成班朋友介紹幾個富二代佢識。嗰晚3個筍盤啱「阿妹」心水嘅，有「小鮮肉」同「純品」。阿妹諗住揀第3個「公子」，點知兩個閨密即刻跳出嚟話女得個樣，其實係道友，另一個「小鮮肉」就女朋友似走馬燈，梗係揀「純品」啦！
「純品」最啱「阿妹」係夠高大又有名氣，佢一見到「阿妹」就心心眼，呢個世界你愛我多啲我就幸福啲，所以「阿妹」好快就同「純品」做男女朋友。最好係乜呀，你哋以為「阿妹」屋企多金，原來「純品」背景仲猛料，咁多年佢唔駛點做係因為老豆有權有勢但好低調，依家一對後生仔女修成正果，雙方家長同一班老友都相信世界上係有金童玉女同真愛！
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
