「好命妹」為老爺面子 延遲再婚積福愈嫁愈好
既然做得令全城女人都羨慕嘅「好命妹」，行呢個晚運的確係做咗十世好事至有咁嘅命水。嫁第一次嘅「好命妹」唔係好開心，但以一個乜都唔識嘅靚妹，嫁入咁大個門口又真係好誘惑，加埋老豆係咁話呢個門口好，唔嫁就笨。
嫁入去又點啫，有錢人唔見得濶佬，外家一啲都唔可以靠「好命妹」幫到屋企生意，反而因為普通人家畀老公睇唔起，有錢仔多女人埋身係日常，「好命妹」所以做咗生仔機器嚟自保。因為「好命妹」脾性好，竟然係家族場合遇到「有為」，雖然使君有婦，但「有為」話明會為「好命妹」發奮上進，要做個有錢人，果然用咗10幾年時間成為城中才俊。
同時「有為」仲同老婆攤牌話要幾多錢都得，但求回復自由身，搞咗幾年「有為」終於如願以償，點知喺呢個時候「好命妹」同佢講一定要等多一啲時間，為咗大家面子唔可以任意妄為。結果等到老人家壽終正寢，兩個人至可以大大方方公開關係，而且半年唔夠就低調結埋婚，似乎「有為」下半生嘅努力都係想娶呢個女人，而且婚後人前人後真恩愛，最近仲將自己副身家同老婆兩份分，「好命妹」完全無諗過，難怪愈來愈風騷。
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
