5月18日，短暫時間有陽光，日間天氣炎熱，早上部份地區有霧。晚上局部地區有幾陣驟雨及雷暴。美國提高債務上限僵局現曙光，美國總統拜登與共和黨籍眾議院議長麥卡錫都表示，決心為提高聯邦債務上限盡快達成協議，避免出現債務違約。此外，美國區域性銀行Western Alliance表示，截至上周五過去一季銀行存款增加逾20億美元。市場憧憬銀行業危機將過去，Western Alliance收市升逾10%，唔少地區銀行都錄得不俗升幅。美股三大指數全部升逾1%，標指守住4100支持，又準備挑戰4200-4300阻力，科技股維持強勢，納指有望向上挑戰13000阻力。

Target公布業績，果收入及盈利均符合預期，但同店銷售保持疲弱，錄得低個位數下跌，反映中產消費能力有所減退，庫存減少了16%，有所改善，但非必需品需求仍疲弱，管理層對入貨已作出改變，並保持全年預測在正負單位數之間。不過市場氣氛好，股價升2.58%，帶動上日因為業績麻麻嘅Home Depot股價反彈逾3%。今晚輪到Walmart出業績，估計零售股今年餘下時間業績表現一般。

雖然美股投資氣氛保持暢旺，而資金側重投入科技股，反映納指波動性的VXN跌至19的超低水平，美股受市場情緒帶動而上升，散戶加碼入市追貨，值得留意係但見基金現金水平開始回升，基金喺現水平已停手唔再買貨，現階段對美股都唔可以過份樂觀，居安思危，提高警覺性。

至於港股都係無乜好講，成交跌穿一千億後，低成交漸成常態，反映市場內仍缺乏資金，日升日跌嘅走勢，指數權重股只淪為大戶舞高弄低指數嘅工具。至於上月得到阿爺加持嘅中特股，升到呢啲水平開始無以為繼，反而上月偏弱嘅ATMJ近日開始炒業績反彈，不過缺乏買盤承接下，唔少股份業績後高開低走，百度(09888)噚日就係跟ADR高開後，終倒跌收市，更見成交增加，反映有沽盤趁好消息出貨。

至於噚日收市後公布業績嘅騰訊(00700)業績表現平平，由於業績前股價已炒高，今日股價表現難有驚喜，就算高開都有機會低走，噚日追貨博業績嘅散戶又淪為韭菜。目前港股仍然係靠中資力托，可惜二萬樓上舉步為艱，外資逢高沽貨，阿爺想托高港股亦有心無力，留意幾隻重磅科技股業績過後，已再冇借口炒上，小心恒指跌穿19400水平，失守全部移動平均線後，或進一步回落。目前港股仍然喺19400-20400之間上落，一旦失守19400重要支持，唔排除移動區間將下移。