黑人衰爛賭離婚 勝在賭品好輸極有錢找數
呢幾年論落泊，都非「黑人」莫屬，早年當旺時娶埋「假眼」創業風風光光，有運時同「假眼」又真係好恩愛。「假眼」雖然細「黑人」好多，但錫到自己燶，就梗係受溝而且名氣大，難免係虛榮心作怪。
但生咗仔之後，兩個人距離愈遠，始終思想上有距離，「假眼」最怕被管，於是撻着「後生仔」唔俾面「黑人」而離婚收場。不過其中一個原因係「黑人」太鍾意賭，好多時唔諗就一副身家賭命咁，令「假眼」心寒。
講開又講，「黑人」真係好鍾意過大海，未通關都飛出去隔離完嚟賭，但最近大海嗰邊打貪打得好犀利，而且限制賭額，令「黑人」覺得唔夠刺激。於是轉戰香港，因為呢邊有一大班有錢朋友，個個興玩加洲撲克，每逢星期六日都會過嚟一次，搭飛機坐車總之有得賭就一call即到。
玩悶咗就上賭船，出到公海點玩都得，玩到夠就經港珠澳大橋或深圳返屋企，聽講為咗方便賭，隨傳隨到竟然起深圳整咗間屋。每次賭親唔係少錢架，三兩百萬上落閒閒地，而且「黑人」賭品非常好，輸幾百萬都唔會發脾氣，氣定神閒。問題係大家都質疑，點解佢賭極都有，錢從何來呢？
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
