5月31日，天氣酷熱，部份時間有陽光，初時局部地區有煙霞。兩黨已就債務上限達成協議，但財政部承諾未來兩年除國防開支，唔可以提高其他財政開支，換句話講，美國經濟之後就算有乜冬瓜豆腐，白宮喺2025年1月前，都難以推出刺激經濟方案，所以美股有少少轉弱，三大指數個別發展。目前美股主要靠AI熱潮支撐，相關股份升完再升，利好科技股氣氛，但升勢過份集中，一旦呢批AI股稍為轉弱，美股隨時走勢大逆轉。

當債務上限問題解決後，市場焦點又返去月議息會議，目前距離議息尚有三個星期，本周將會有多位聯儲局委員密集發言，今晚亦會出小非農數字，周五將公布就業數據，美國10年債息升至3.85%後回落，6月加息0.25%嘅機率已回升至超過六成。

全球AI大熱，美股嘅相關股份升到上太空，阿爺一直話要加快國產AI芯片升級方案，並要求於2025年需實現掌握關鍵核心技術，並將AI產業規模將提升至3千億元，阿爺有意培育5至10家的獨角獸企業，尋日呢個消息，帶動A股尾市由跌轉升。回想起2018年，內地已曾搞過「中國芯大躍進」，結果2年內有好幾間百億芯片企業倒閉，其中更有些是集資過百億元後，卻連一片芯片都未出產過便倒閉。而最近亦有國產芯片發布後，被發現只係將人家Intel芯片磨去，打印自家品牌嘅笑話，國產芯片呢啲炒作，古天后打死唔信，稍有不慎信以為真，買入相關股份，最終又係變成韭菜被割。

至於港股噚日結算繼續尋底，出現先高後低走勢，但尾市稍為拉升，日線圖見十字星，但至夜期及ADR又一瀉如注，睇怕今日股都係難逃再跌，港股完全無力反彈，即使呢兩日成交有所增加，內地資金開始出手買貨。只係呢頭內地資金買，嗰頭外資出力沽，此消彼長下，港股都係無力反彈。