鑽石山荷里活廣場前日（2日）發生駭人命案，兩名女子被患有精神病的光頭男子用刀狂捅殺害，引起全城關注。林作在社交網分享一張模仿疑犯裝束的照片並留言惹禍，今日遭任職的保險公司發表聲明終止合約。林作的媽媽王莉妮（Lily）今日接受《星島頭條》的電話訪問，對於兒子的去向，她直言不擔心：「我個仔金子，去邊度都會發光！」
【相關文章】：荷里活廣場兇案｜林作抽水惹禍 親證被保誠解僱：公司冇講原因，我未知方向
荷里活廣場兇案｜一文睇清林作抽水被炒時間線！連發多Post自認多支持者揚言堅拒道歉
【點擊睇林作與媽媽合照】：
現為保誠資深區域經理的林作，今日接受《星島頭條》的電話訪問，承認已經收「大信封」：「我未知方向，7日內約公司傾，我唔係即時解僱，公司話短期內會解僱我！」林作堅稱自己冇後悔：「我而家冇官一身輕，唔再綁手綁腳，可以向網民挑機！」而林作媽媽亦表示今早已經得悉事件：「我同佢傾咗成朝偈，聽晚大家約咗食飯，大家溝通，我一啲都唔擔心，阿仔係好有個性，佢想講嘅嘢係阻止唔到，『東家唔撈咪撈西家』，我個仔幾勁，要將佢睇做一粒金子，去邊度都會發光！擔心乜嘢呢？」她續說：「我個仔讀咁多書，去到邊都好敬業，你睇吓佢喺保誠做得幾叻？舊年拎晒所有獎， 所以我同佢講，唔使太擔心，呢啲係天意，去到呢個時候，可能對你嚟係好事，而並不是壞事，呢個係考驗嘅時候。」
叫得『林作』注定係要講嘢
今次林作的言論受到全城喪鬧，問到會否勸他收歛一點，林作媽媽說：「有，我哋有探討過呢個問題，阿仔話佢天生就係咁嘅性格，你叫我唔講嘢呢，就唔係叫『林作』，呢個注定係要講嘢，為呢個社會出聲。好似之前佢同鍾培生打拳，臨上台都有啲擔心，我得呢粒仔，但係阿仔話呢個時候唔上台，將來仲點使搵食？唔可以喎，佢仲話我作為老母，唔可以喺呢個時候勸個仔收兵，將來要香港人出力。呢點我真係好佩服佢，佢唔自私，其實我個仔係唔使做，屋企又有樓畀佢收租，我得一粒仔，所以有畀晒佢都夠佢做一世二世祖，我哋唔係大富大貴，但係過得比好多人好。」
不過林作媽媽稱阿仔不甘於這安排：「佢話自己唔甘心坐喺屋企似富二代，要為社會作出貢獻。佢仲話：『媽咪，人生好短暫，何必要萎萎縮縮，不如過一個精采人生』，所以我做人老母，只可以佢做乜都支持，但係我係有條件，唔可以犯法，佢就話今次冇觸犯法律，可能係言論激烈咗啲。」她稱可能阿仔從小在外地長大，言論難免會大膽啲：「我叫佢呢段時間要冷靜啲，好事定壞事大家都唔知，或者仲有啲好事等緊佢，做人要樂觀啲。」言論間林作媽媽對公司的決定似乎有微言：「佢只係講錯少少嘢啫，唔係咁就郁佢？不過我覺得係好事。人才係好緊要，任何公司搵到個咁醒目、叻仔，成績係做出嚟，唔係靠把口講。」林作媽媽的人脈相當強勁，有不少內地娛樂圈先後向林作招手她又稱阿仔對公司好有感情，試過有人找他跳糟都不願意：「佢餓唔死，大把人搶佢，只係睇吓佢想唔做，我都有叫佢跳糟，以前都對阿仔有啲意見，覺得佢啲作風好高調，可能得罪啲老細，但係佢話唔想，好感恩向生畀好大自由度，又好感恩佢畀機會，所以冇走。」
百分百支持個仔唔會做平凡人
林作媽媽稱會支持阿仔到底：「佢仲未成功，仲喺拼搏中，我個仔唔會做平凡人，有理想達到，唔會因為呢少少挫折影響，佢會發揮同鍾培生打拳嗰種精神，雖然打拳輸咗，但精神上贏咗，100人入面有60人鍾意你，40人唔鍾意你，你都贏咗喇！老闆既然唔欣賞你，咪算囉，緣分盡咗，咪適應佢，只要佢睇好嘅嘢，我係絕對支持！」
林作媽王莉妮在兒子林作出世時仍是打工仔，為搵更多錢供囝囝入好的國際學校，早年她瞓身買股票終賺到第一桶，後來單人匹馬跑遍東北三省找生意，結果名下經營地產及環保業務的善美集團愈做愈大，2013年還跟楊海成旗下的實德環球合作。據悉，王莉妮坐擁逾億元物業，有消息指她於2016年以6,338萬港元購入的中半山嘉年大廈複式豪宅，去年初以9,180萬港元沽出，該單位每層實用面積達1,694平方呎，兩層合共3,394平方呎，惟林作隨即在社交平台澄清未有成交；而林作則居於同棟大廈另一伙高層戶，該單位於2012年以3,500萬元購入，由他和母親聯名的公司持有。
【其他文章】：
姚子羚加國探小背心鍾嘉欣 網民集體回憶15年前《金石良緣》姊妹情
萬眾同心公益金2023丨夏大衛博士4.5萬呎家族大宅開金口 巨型壁畫雕塑具氣派
陳凱琳4歲大仔鬼馬整包老師讚有天份 網民揭秘呢個部位夠大有福氣
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
