前落選港姐廖慧儀（Jessica）最近在主持的J2旅遊節目《趁而家去大馬偷食...譜！》中換上低胸裝，又狂晒長腿及24吋纖腰，甚受巴打歡迎。從2020年參選港姐到變身「J2女神」，26歲的Jessica曾有段黑暗日子，跟孔德賢傳緋聞，舊愛Sam疑為情困輕生，自此打入冷宮，去年尾終獲解凍再現幕前，強調自己都唔好過的Jessica為自己平反：「我抗拒亂搞男女關係。」採訪：方騫平 攝影：鄧國良 場地：hotel icon the market
作為瑜伽導師的廖慧儀三圍35C、24、34，超Fit身形唔怕露，在J2全新旅遊節目中着緊身小背心晒深坑事業線，忍唔住一睇再睇。在公已經如此大方，在私更加不得了，社交網內有八成相片都全方位晒完美曲線，泳衣、瑜伽衫、運動緊身小背心，梗有一款啱你心意。她坦言有唔少網友DM要求交友，又話喜歡她：「我覺得呢啲係友善表現，不過都試過收到一啲不雅相，男人性器官、做gym相…我睇完大笑冇回覆，呢個世界真係有好多搞笑嘅人，佢咪send嚟囉，又唔覺係騷擾嘅，反正我無聊先會睇吓。」Jessica 自爆甚至有人提出「包養」：「經驗之談，尤其係藝人好容易畀人改圖，所以唔理就係最好嘅處理方法。加上疫情下網騙案好多，成日接到電話『係咪阿…呀？』網上世界好多假嘅，唔好咁認真。」
解凍後好多嘢做
因為感情瓜葛，形象插水遭無綫「雪」足一年的Jessica愈嚟愈多機會，除做過真人show《港女野人》主持外，剛客串拍新劇《奪命提示》。目前是無綫娛樂新聞台主播，稍後挑戰連續60小時不眠不休的《我要瞓鬥》。Jessica自言好期待：「因為贏咗有總值10萬蚊獎金獎品，但最怕只係有眼眼圈。」談及跟前輩劉佩玥拍《奪》劇壓力較大：「本身劇本寫我係打沙包，點知現場改咗對打，幾驚錯手打親佢。」
多謝C君令她重生
Jessica好感激前J2創意總監C君「執」她返去做《港女野人》令她重生，從中能調節心理，做返個正常人。對於兩年前舊愛離世事件，Jessica首度開腔剖白：「其實事發後我冇擔心過仲可唔可以繼續喺娛樂圈發展，反而關注心理健康問題，因為當時情緒唔穩定出現抑鬱，喺屋企係咁喊，抗拒接觸人，身心都有障礙，只係你哋睇唔到我個傷口。」Jessica父母和好友都好肉赤她，認為她只得23歲，唔應該面對如此困境，承受咁大壓力，「爸媽仲提出『隨時可以移民，唔做呢行…』」雖然Jessica有睇專科醫生尋求協助，但最後都係靠自己行出嚟，主持《港女》迫自己面對鏡頭：「好記得拍完第一日我忍唔住爆喊發洩話『好耐未試過有咁多人望住我，我好驚呀…』睇返嗰時狀態仲係唔OK。」
不吐不快鬧爆改圖
單身的Jessica唔想有咁大壓力，拒同男藝人拍拖，見過鬼怕黑亦會小心處理感情問題：「做藝人要小心啲，就算出席朋友嘅生日活動，都要睇吓有乜人一齊去，始終唔太方便。」問到愛情觀？她坦率說：「我唔係老，唔使收斂作風，緣份嚟唔抗拒拍拖，但抗拒亂搞男女關係。」經一事長一智，Jessica除會慎言，亦唔怕辛苦做多啲，求有穩定收入，另外想拍劇及喺銅鑼灣大螢幕見到自己，畀父母睇到個女真係藝人。最後她不吐不快：「有啲嘢我冇講過，但會被改圖搞到完全相反，做藝人好多時真係解釋唔到…𠵱家我個人冷靜到都幾得人驚，好似冇晒感覺咁。」
《星島頭條》APP經已推出最新版本，請立即更新，瀏覽更精彩內容：http://www.stheadline.com/
