6月28日，大致多雲，有幾陣驟雨，早段局部地區雨勢較大及有雷暴。隔晚美國公布消費者信心指數好過預期，美股即反彈，三大指數向上，道指升212點；標指逼近4300見支持反彈，目前仍於高位徘徊，隔晚回升49點；納指則升219點。VIX目前不足14，仍然係低位，暫時美股唔似會轉勢，一旦VIX升穿17/18就要小心。

美股暫時喺消息面上較為薄弱，俄羅斯嘅內亂來去如風，暫時威脅解除，呢方面對資本市場暫未有太大負面影響，市場焦點係去返7月份FOMC嘅議息會議上。鮑佬一直未肯放鴿，更指今年減息無望，而且仲要加息一至兩次。美股之前炒減息效應，奇怪係鮑爺都講到明今年唔會減息，美股未有因此回調，睇嚟目前美股流動性仍然充裕。咁嘅情況下，似乎要注意資金流向，比消息面更為重要。

年初時，大家都睇死美國經濟或陷入衰退，結果美國經濟並未有預期咁弱，剛公布嘅消費者信心指數由102.5升至109.7，反映喺美國大型企業裁員潮浪接浪下，美國民眾消費習慣未受影響，呢個係美股上升所帶嚟嘅財富效應所致。不過大摩繼續其魔笛追魂，指6月就業數據會出現大幅放緩，8月份更有可能出現負增長，第四季開始非農就業人數或保持不足10萬人，至2024年減息後情況先會有好轉。不過大行嘅預測，參考下咪算數，有幾準確，大家心中有數。

港股明日結算，喺結算前夕，轉倉高峰期呢兩日，預咗又係啲日升日跌悶局，不過只要睇住成交額，基本上港股仍然係買賣兩閒，都係嗰句，欠缺成交支持下，只係大戶操控指數上落，個別股份或板塊隨消息炒上落，但欠缺人氣無人跟炒，一個唔小心高追，資金又被鎖，散戶韭菜被割得多已學精，寧食花生唔入場，成交只有繼續縮水，咁嘅情況下，實在睇唔到港股會有轉機，悶局繼續，只怕咁落去，遲早又陰乾。