7月6日，大致天晴，早上局部地區有驟雨及雷暴，日間天氣酷熱。美股隔晚低開，但沽壓唔算太嚴重，三大指數跌幅有限，道指跌129點；標指跌8點；納指跌25點。標指仍穩守4400，上升通道頂部為4380，為短線回吐第一支持。

美國聯儲局6月議息會議紀錄偏鷹，會上委員大部份支持今年再加息兩次，暫時核心通脹仍然向下，但工資高企，隨時令通脹反彈。不過美國6月SM製造業PMI降至46，反映需求疲弱令製造業生產放緩，供應商有更大議價空間，間接壓低通脹增長，但留意新訂單指數由42.6改善至45.6，庫存指數跌至44偏低水平，製造業有望開始觸底反彈，屆時或會再拉升通脹。

一直支持美股嘅最大動力，仍然係資金相當充裕，不過白宮已成功推高國債上限，財政部加碼發債，從市場吸走資金，目前每月市場大約失去約950億美元流動性，流動性一旦持續收緊，美股即使唔出現大幅度調整，都難以再大幅度向上。即係現水平嘅美股，值博率已大減。

至於港股周初反彈兩日，至50及250日線前行人止步，即使周初上升，但明顯成交未能配合，周二更縮水至不足800億元，挾淡倉意味濃厚。噚日回落，恒指失守20日線，雖然現貨險守10日線，但期指已失守，並於夜期進一步向下，預計今日現貨將失守10日線。現資下一支持位為18800，之前都多次強調，一旦失守18800，大市將出現新一輪跌浪，下一支持為18500，下破定必考驗5月低位，一旦18000下破，今年將出現另一個低位。港股最大問題仍然係資金不足，成交愈玩愈縮嘅情況下，根本易跌難升，偶有反彈都不過係挾空倉，趕退淡友嘅技俩，港股日趨A股化已成定局，有波幅，冇反幅，可能要持續一段再長間，直至有長線基金及外資再重新入場，先可以扭轉困局。