ViuTV選秀節目《全民造星V總決賽》昨晚完滿結束，負評王Nathan（魏念恩）在出賽前突然於IG宣佈退賽：「我決定退出今晚的總決賽，為各單位帶來不便好對唔住，我會盡快交代事情。」經過一晚的沉澱，今日Nathan終於在IG撰長文交代事件經過！
【相關閱讀】：全民造星V總決賽丨Nathan魏念恩是非纏身宣佈退賽 狂爆負面新聞大熱變負評王
【點擊睇Nathan參加全民造星】：
今年5月在《全民造星V》首播期間，Nathan驚傳女友Jessie墮樓身亡，到了總決賽前夕，Jessie的家屬接受訪問，大爆Nathan分手後仍繼續向女友借錢，還要求女方刪除與他有關的IG帖文，更有對話截圖作證，結果Nathan一夜間變負評王，今日他撰文交代事情：「因為事發後透過共同朋友得知對方家屬唔想事情再被發大，更加唔想對方被起底，而我都同意（所以接下落嚟我將會用「對方」去稱呼佢）。我認為感情問題係屬於我哋嘅私隱，所以一直未有向外界交代，選擇沉默去面對新聞或外界嘅評論。」
人生經歷過最黑暗的日子
Nathan直言女友自殺當晚是人生經歷過最黑暗的日子：「當時我好自責，腦海裡面不停出現無數個『如果……可能就唔會……』。期間一直好想同對方屋企人聯繫，好想親口向佢哋道歉，解釋一切來龍去脈。但係我真係好驚，未試過咁驚，畢竟事發之前同對方嘅屋企人並無太多聯誼，亦未試過面對咁重大嘅事情，完全唔知道應該點樣處理。」他續說：「喺呢段時間我覺得恐懼、內疚、自責、傷心、甚至失眠，心情好複雜、好混亂。同時，節目就開始播出。從來都唔想身邊嘅人擔心我，想儘快話俾身邊嘅人知『我無事，請放心』。結果我由一個極端跳咗去另一個極端，我以為保持輕鬆玩樂Chill嘅態度去對面大家，就可以令大家放心。」
成功進入了十強後，Nathan稱有朋友看到他十強後做過的訪問後，竟然有這個反應：「佢同我講覺得我好反常，從來未見過咁樣嘅我。然後我自己睇返，我自己都覺得好嘔心，行為十分輕浮。我喺嗰一刻先發現，原來我一直都未搵到一個啱嘅方法去面對呢一件事。」他續說：「我覺得自己有好多做得唔好嘅地方，包括事情發生後，冇立即同對方嘅家屬溝通，以及喺喪禮上錯過咗同對方家屬面對面溝通嘅機會。一直未能捉緊機會向對方家屬致歉，成為咗我現時最大嘅遺憾。
令到事情發酵至今，好想喺度鄭重向對方家屬致歉，好對唔住。而我私底下亦開始嘗試同對方家屬聯絡，希望未來可以有機會同你哋好好溝通。」
因7月15日的報導退出比賽
他又稱當時決定繼續參加總決賽，是希望對作為參賽者呢個身份負上責任，做到有始有終，但最終決定退出比賽，因為7月15日的報導：「我發現關於呢件重大事情上，仍然仲有好多事情未好好處理。好想向所有受到影響嘅人，包括所有參賽者、導師、節目製作組，以及原定受安排同我一齊合作嘅表演嘉賓、音樂人、造型團隊等，喺度鄭重向你哋致歉，好對唔住。」
對於「借錢」一事，Nathan亦希望向家屬澄清：「當時我同佢拍拖期間，我哋雙方都有穩定嘅工作，但係出糧嘅時間好唔一樣，第三者睇到WhatsApp對話可能會對『借錢』一事感到難以接受，但事實呢個就係我哋當時資金周轉嘅生活模式，甚至持續到去分手之後。但當我發現分手後繼續與對方有金錢瓜葛會令關係都完結得唔夠乾脆，所以喺事發前我已經約對方當面見面並以現金還清。假若家屬再有關於我哋感情問題或者對喺電話上所睇到嘅一切仍然有唔理解嘅地方，我好樂意向你哋逐一交代。」最後，Nathan感恩一直支持他的人：「令到你哋擔心，對唔住。」
【其他文章】：
全民造星V丨大熱Nathan魏念恩陷負面新聞遭全網唾棄 參賽提癌母爆喊大打親情牌
全民造星V｜Nathan魏念恩被爆分手仍借錢 已故女友手機對話曝光更多要求
全民造星V丨Nathan魏念恩首度開腔悼墮樓亡女友：妳是我遇過最溫柔的人
全民造星v｜大熱參賽者2號魏念恩女友傳墮樓身亡疑受情緒病困擾 Nathan IG頭像轉黑
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
