一輛有大量「吉位」的巴士早前竟爆出爭位風波，兩名女乘客在車上你一言我一語對罵長達5分鐘，期間粗口橫飛。涉事的拍片女乘客更爆出啜核對白：「拿，呢張凳呢個界喺度」、「你唔好掗我呢邊嘅位」、「你畀一個人錢呢，就坐一張凳」、「你自己包晒成架巴士啦」、「小朋友塞住耳仔唔好聽（粗口）」、「人人得以誅之你吖」、「你嗰啲蝦呀、蟹呀攞出嚟吖」。
巴士大媽爭位坐對罵5分鐘逐格睇 ＋ 網民睇唔過眼回應↓↓↓↓
巴士正途經蒲崗村道
在網上流傳的短片長約4:55秒，由其中一名涉事的女乘客拍攝（下稱大媽A），當時巴士正途經蒲崗村道。
事情大要是涉事的另一名女乘客（下稱大媽B）原本坐於車上右邊的關愛座，拉著買餸車的大媽A上車後手指指，拍片批評對方「掗住兩張凳」，要求對方「借借」並坐下，雙方連隨發生爭執。
大媽B表明「冇掗住兩張凳」
大媽B表明「冇掗住兩張凳」，並回話「你野Ｘ蠻嘅」，但為免再生爭執，主動離坐轉坐其他空位，大媽B讓座轉位後，大媽A並無停口，並藉車上有兒童借題發揮，指「小朋友睇唔睇到呢啲，唔好學呀吓」、「小朋友塞住耳仔唔好聽」。
為之氣結的大媽B自爆「已唔X舒服㗎啦」、「啱先出院咋，阿姐」，不滿對方撩交嗌，豈料未獲同情，大媽A回應「唔舒服咁好中氣鬧粗口嘅」、「咁係你嘅事啦，係咪先」。
回應的網友普遍力挺剛出院的大媽B，批評拍片的大媽A「撩交嗌」、「撩事鬥非」，有人更指「訪問一百位觀眾，得一個答案：拍片者係一位超級賤人」。
大媽A與大媽B對罵詳細節錄：
大媽A：唔該借借吖。你係咪掗住兩張凳先
大媽B：我幾時掗住兩張凳呀，你坐你就坐呀，你唔坐就唔好坐
大媽A：拿，呢張凳呢個界喺度，你縮返你隻腳，你嗰邊大把位，你唔坐埋去
大媽B：咁嗰邊（指巴士上其他位置）呀夠大把位啦，你又唔坐呀
大媽A：我鍾意坐呢度呀
大媽B：我夠鍾意坐呢度咯，你野Ｘ蠻嘅，你真係呀
大媽A：你縮返你隻腳，你唔好掗我呢邊嘅位，OK大家禮貌啲，理性啲
大媽B：你唔禮貌先㗎
大媽A：你咁樣即係唔講道理啦，係嘛
大媽B：唔講道理
大媽A：你縮返隻腳啦，我坐到我都算數，你唔好話太過分，O唔OK呀
大媽B：好似你過分啲喎
大媽A：咁你都不至於係咁樣打斜坐吖，係嘛
大媽B：咁邊角係咁逼㗎嘛
大媽A：一係我坐入面啦好唔好，如果係咁樣，我坐入面，我唔介意㗎，你介唔介意先
大媽B：黐Ｘ線㗎你，我唔會同你坐啦，畀Ｘ埋你坐（連隨起身轉位）
大媽A：最好添
大媽B：黐Ｘ線㗎你，一啲衛生常識都冇
大媽A：帶走啲垃圾呀，你有衛生，你自己包晒成架巴士啦
大媽B：做乜Ｘ嘢啫，你臭Ｘ，撩交嗌呀
大媽A：好似你撩交嗌多啲呀
大媽B：你撩交嗌先㗎，邊個上嚟先呀，你叫我做咩呀
......
車上家長疑似輕聲跟小朋友說：過嚟我呢度呀，過嚟呀，唔該你呀，係過嚟呀，入嚟
大媽A：小朋友睇到呢啲唔好學呀吓，知唔知道，好乖嘅
大媽B：唔好學呢啲八婆呀，野蠻無理㗎
大媽A：你唔好喺小朋友面前講粗口，唔該
大媽B：講咪講啦，做咩呀，言論自由
大媽A：言論自由，不包不禮貌
大媽B：你唔好咁Ｘ多嘢講呀，畀Ｘ埋你坐呀，臭Ｘ
大媽A：小朋友塞住耳仔唔好聽
......
大媽B：已唔X舒服㗎啦（被拍片的大媽A拉近鏡頭影大頭）
大媽A：唔舒服咁好中氣鬧粗口嘅
大媽B：鬧你咪鬧你咯
大媽A：唉，咪繼續鬧啦，唔好停呀
大媽B：你都黐Ｘ線
大媽A：繼續呀
大媽B：你得閑㗎你呀
大媽A：係呀，你得閑呀嘛，咁呀，你鍾意搏大家眼球
大媽B：你再嘈吖拿，你再嘈吖拿
大媽A：咁呀點吖
大媽B：呀點呀嚇
大媽A：你咬我呀
大媽B：咬你，講嘢，野蠻呀你
大媽A：你咬我呀
大媽B：死臭Ｘ（之後閉目）
大媽A：仲有咩呀，吓，繼續講吖，繼續講吖，唔講啦，收聲呀，係咪唔講呀，唔講呀似樣啲，斯文啲嘛，女士嚟㗎嘛，係咪
大媽B：對你使乜斯文呀
大媽A：咦，做咩又講一句又唔講嘅，繼續講啦嘛，言論自由呀嘛，嚟吖，爆粗吖，呀，咁多個街坊睇住你，你早都應該係斯文啲啦，係咪先，唉，一早收聲咪好咯
大媽B：俾Ｘ埋你坐啦，咁Ｘ多嘢講
大媽A：一早收聲咪好咯
大媽B：咩事要一早收聲啫
大媽A：哎呀，你咁冇禮貌㗎
大媽B：撩咬嗌，啱先出院咋，阿姐
大媽A：咁係你嘅事啦，係咪先
大媽B：咁咪係咯，遇到你個臭Ｘ，咪行衰運囉
大媽A：巴士係公眾地方
大媽B：公眾公眾
大媽A：你畀一個人錢呢，就坐一張凳，你冇理由打斜坐兩張凳嘅
大媽B：打斜
大媽A：你睇你而家坐到似乜啦
大媽B：你理Ｘ得我似乜啫
大媽A：係呀，我梗係理你啦，啲公眾地方嚟㗎嘛
大媽B：你係我阿媽呀
大媽A：唉，閘住，多謝
大媽B：你鍾意扮嘢呀，就死出去扮啦，喺度玩嘢
大媽A：好似你扮嘢多啲哇
大媽B：你扮嘢多啲呀
大媽A：你問下啲街坊呀，睇你似乜啦，係嘛
大媽B：你理得我似乜啫
大媽A：哎呀，我真係唔得閒理你呀，你掗住公眾地方嘅空間就唔啱啦呀，人人得以誅之你吖，係嘛，不過你都冇文化唔識聽㗎啦，你淨係識講粗口，你講多啲，我成全你
大媽A：仲有咩講呀，呀，你嗰啲蝦呀、蟹呀攞出嚟吖，唔講喇吓，吓，各位街坊呢啲人呢，唔好縱佢呀，知唔知呀，有人收佢㗎
大媽A：呀，唔講粗口呢，我就唔影你啦算數
網民大都不滿大媽A撩交嗌：
有回應的網民估計涉事巴士應「該係203E」線，且大都不滿大媽A撩交嗌：
●懶正氣
●大把位唔坐
●小學雞咩？過界！
●吃太飽了，找架吵
●食飽冇嘢做撩交嗌
●又多嘢講，強詞奪理
●咁多位唔坐，係要走去同人嘈
●巴士阿叔繼承者，巴士大嬸孖住上，真係壓力兩倍大
●呢個呀姐超級正義病上身，巴士大嬸妳好大壓力咩？
●拍片果位搞事多啲喎，咪以為拍片就係有理，重點係車內大把位，有手拉車可以放門邊行李位，唔一定要讓座喎
●有乜好嘈呀，架車大把位，兩位大姐搭車啫，使乜咁多事呀，大庭廣眾，失禮死人，請尊重人格，防礙人搭車，相嗌唔好口，退一步海闊天空，互相尊重咪無事囉
●叫人讓位都仲咁惡！真係撩咬嗌，惡人先告狀，我都唔爭你，仲好意思拍人哋擺上網，唔知醜果隻係你喔！
●人哋胖坐出咗少少，你使唔使惡人先告狀呀，仲好似自己好有理咁，真是不知所謂
●以為自己好斯文，唔講粗口唔代表斯文，係要俾人講粗口鬧
其他網民回應請瀏覽上圖↑↑↑↑。
巴士相關新聞：
●男乘客搭巴士多「吉位」仍坐少女旁邊港男拍照公審惹熱議
●巴士阿叔鬧喊少女阻落車 坐隔離賴死唔郁 網民指一句話露色心
本港社交平台早前熱傳一段阿叔大鬧城巴的影片，有大叔坐正少女隔離，少女欲下車竟堅拒不「放行」，引來司機干預，但大叔竟發狂鬧喊少女，網民點出大叔罵語中有一句話已顯露其色心。
事件發生在天水圍，本周三（15日）晚上，涉事巴士為城巴967X，來往天水圍（天恩邨）及銅鑼灣。有乘客拍攝到事發情況，片長約45秒。
直擊巴士阿叔大鬧城巴 一句說話露色心？（足本字幕版）↓↓↓↓
