7月28日，部份時間有陽光，局部地區有驟雨及狂風雷暴，日間天氣酷熱。繼美聯儲局如預期加息0.25%後，歐央行亦如預期加0.25%，聲明中未提及會再度加息，歐洲股市做好。不過10年美債息曾升穿4%，美股急轉直下，三大指數全線下跌收市，道指跌237點；標指跟納指分別跌29點及77點。
今日輪到日本央行議息，有有報道指日本央行會放棄打壓長息上升，暗示日圓可能結束長期貨幣寬鬆政策，引發借日圓Carry trade進行拆倉。若然連最後一個低息國家日本都開始部署加息，市場擔心再難以低成本借錢，美股就借勢回吐。
市場比較擔心再無低成本資金可借拆借，喺過去一年歐美持續加息，已逼使市場向日本呢個最低息嘅國家進行借貸，不過如今連日本都有意進入加息期嘅話，歐美息口則保持喺高位，環球借貸成本將有升無跌。不過美股目前氣氛保持樂觀，但美國經濟數據強勁，令美息將保持高位一段時間。
美匯指數跌穿100大關後反彈至101水平徘徊，近呢兩個月環球熱錢大量湧入南韓、印度地區，唯獨人民幣斯人獨憔悴，近日人民幣從7.24急升，主要係因為政治局會議，阿爺出招要谷經濟，噚日早上人仔更一度升至7.116半年高位，不過至晚上又打回原形，又跌回7.168水平。人民幣回軟，中概股下跌。隔晚夜期跟ADR軟，預期今日港股將低開。
睇返呢個星期港股喺周二急升，成交雖增至1,421億元，但翌日回吐成交又縮水至875億元，呢個係反映周二急升，有空倉回補令成交急增，至翌日回吐成交縮水，即係未有買盤趁回吐跟進。
即使噚日再度回升，但成交只有1,135億元，同樣未見新資金流入，相對3月低位2,000億成交，以及去年10月低位二、三千億嘅成交，以及11月持續地1,800嘅成交額，近日嘅升市成交額，都不足1,500億元，而去年大部份時間港股日均成交額達1,200億元，但今年上半年，更大部份時間只得1,000億元以下，港股就繼續喺一個大型區間上落。
噚日恒指剛好升至接近日線保力加通道頂部未能突破向上，明顯受制下降軌，一旦今日再失100日線19,567，並進一步考驗250日線19,317點，均告失守後，本輪反彈又可能結束。由年初1月高位延伸至今跌勢，仍然會係一浪低於一浪，就算唔再穿3月低位，有機會行個收窄三角形，即係回調再落去下試多條平均線支持。
相關文章：
銀債2023 ｜7.28起供認購保底息5厘 一文看申請方法、資格｜附銀行、證券行優惠
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
