港股｜8月2日，大致天晴，但局部地區有驟雨，日間天氣酷熱。隔晚美股個別發展，道指維持升勢，升71點，但標指跟納指分別跌12點及62點。剛公布嘅美企業績表現參差，Tesla及亞馬遜收市跌2.4%和1.5%。銀行股有沽壓，花旗及富國銀行收市跌超過1%；地區銀行KeyCorp及US Metro Bancorp收市挫2.6%及1.4%。不崩市場已認定聯儲局7月加息0.25%後，有機會係今次加息周期最後一次加息，今年餘下時間議息時，維持息口持平，即美息有望見頂，整體氣氛嚟講仍然唔錯，美股暫時高居不下，高位整固。

至於港股急升兩日，裂口高開但出咗兩枝陰燭，雖然成交增加，有人認為係成交增加配合升勢，但望返轉頭，之前低位成交薄弱，即係未有資金低位入場，大戶低位唔買貨，高位先嚟追貨，似乎講唔通，反而似係趁高位派返啲貨出去畀追貨嘅散戶，從而令成交增加。睇返內房股趁阿爺開金口救市，就見有內房股衝出嚟配股集資，阿爺未見有具體救樓市方案，打打嘴炮就有內房出嚟抽水，內房債務問題點解決，到呢一刻都只係空談。

內房股要自救，首先係要做好銷售，賣新盤套現資金回籠，內房企業先能夠生存落去，不過內房企業賣一手樓，但二手樓業績同樣心急放盤，目前係供過於求，買家市場，買家有更大嘅議價能力。7月份主要城市物業成交量同比跌41%，環比跌43%，一線城市如深圳、上海、北京，同比跌18%環比跌14%，二線城市同比跌47%環比跌55%，三線城市基本上是冰封，同比跌86%環比跌59%。呢啲數字反映內地樓市仍然冰封。

北水彈出彈入

目前年表人失業率高企，做生意嘅亦係蝕住做，阿爺呢個時候呼籲大家促進消費，人民怨聲載道，發改委急急解話，指鼓勵消費非要大家清袋，只係想大家調節開支，提升生活質量。連工都無得開，仲講提升生活質量，真心有啲笑大人個口。外資遲遲唔重返中港市場，講到底係認為政策風險無法評估，朝令政改嘅政策叫人無所適從，而所謂救市谷經濟又只見打嘴炮，未見具體行動，呢啲咁嘅市場，資金實難放心坐定定同你玩，肯入場短炒已經好畀面，就好似北水咁，彈出彈入，肯入場短炒幫下手做成交，都算唔話得。

市場由炒救市回歸現實，隔晚ADR跟夜期跌逾200點，若然今日跌穿噚日低位19,891，向下考驗19,800點關支持，失守再下試上周四高位19685點，即市上周五高位19,940點及20,000點成為阻力，恒指無法企穩20,000點，調整應繼續。

相關新聞：

港股市況｜恒指低開108點 惠譽近30年首降美國債務評級 碧桂園服務升11%

美國評級｜惠譽近30年首降美國評級 各界震驚 黃國英：唔信美國政府 大家可能轉揀Bitcoin

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ