屯門一名帶著兩名女兒的少婦，在一輛巴士上與鄰座婆婆懷疑因為座位問題舌戰。兩人對罵短片在網上流傳，惡媽爆出的啜核金句——我「返屋企點止公主病呀，皇后病添啊！你呢，太后病呀？」，和擰頭擰髻嘴藐藐的誇張鬧人表情包，與引起網民陰陰嘴笑著關注。短片所見，罵戰最終在無入鏡男聲一句「一人少句啦好嗎？」戛然而止。
少婦擰頭擰髻嘴藐藐舌戰婆婆逐格睇 ＋ 網民睇唔過眼回應↓↓↓↓
短片開始時兩人已在對罵中，手抱小女兒，與大女兒同坐的少婦在對罵期間表情豐富，扭身扭勢，全程擰頭擰髻奚落對方；罵戰另一主角、詞鋒同樣厲害的婆婆雖然一直沒有入鏡，但氣勢也不輸蝕，一句「你公主病就返屋企」，引出了少婦連環爆金句：我「返屋企點止公主病呀，皇后病添啊！你呢，太后病呀？」，接著語帶不屑地形容對方為井底之蛙，毫不猶豫地把對婆婆的不滿掛在臉上。
抱B少婦舌戰婆婆對罵詳細節錄↓↓↓↓
......
無入鏡婆婆：你公主病就返屋企
無入鏡婆婆：你唔好喺度嚟發爛渣
短褲少婦：哈，返屋企點止公主病呀
短褲少婦：皇后病添啊
短褲少婦：你呢，太后病呀
......
無入鏡婆婆：嘩，發爛渣得你死呀，真係吖
短褲少婦：哈，咁要見識下啦要
......
無入鏡婆婆：啲野蠻種嚟嘅
短褲少婦：見識少呀嘛
短褲少婦：井底之蛙呀嘛，明㗎
無入鏡男聲：一人少句啦好嗎？
＊罵戰詳細對答請瀏覽上圖↑↑↑↑
樓主長文講「前傳」↓↓↓↓
短片在對罵聲中展開，細心的樓主於是在上載短片時，順道發長文講述事件「前傳」，讓網民對事件的脈絡有個清楚的了解，事情是這樣開始的↓↓↓↓
「個媽咪（短褲少婦）想同個女坐埋一齊，跟住有個婆婆唔知坐咗落去，佢發癲Ｘ個阿婆，佢仲恐嚇個阿婆出屯門小心啲，有啲咁嘅老母真係羞家。可能講得唔清楚，架車本身爆晒，個媽咪本來抱住細女坐右手邊關愛座，個大女就企係左手到睇住架BB車，到兆康站就好多人落同上車。
咁個媽咪一心諗住隔離個人落車就坐返去左手面同大女一齊坐（阿大女已坐咗落左手面），咁啱阿婆唔知頭唔知路就坐咗喺大女隔離。個媽咪就開始發癲，係到單打個婆婆，阿婆就講咗句：你哋想坐埋一齊呀？個媽咪即刻瘋狂Ｘ阿婆，話：頭先咪大大聲同我女講我一陣坐過去囉！咁阿婆就話：吓，我點知，我聽唔到。媽咪：咁Ｘ大聲你都聽唔到？跟住就如片中所述......」。不過，短片並無交代少婦何時坐回大女兒身旁。
網民一面倒針對少婦斥教壞細路
回應的網民幾乎一面倒針對少婦，批評她「教壞細路」、「反面教材」，認為「小事一樁都咁激，同埋個老母咀臉堅不討好，這樣身教小孩，下個這樣的人指日可待」、「做呀媽做到咁，2個囡將來有樣學樣」。
另有人斟酌其擰頭擰髻的吵架姿勢，指「講嘢還講嘢，個頭可唔可以唔fing，個身可唔可以唔扭」、「講咪講囉，頭擰擰咁，唔通信心會大啲」，有人分析指，「心虛怕死又要壯膽，就要用呢啲行為去掩飾」。
有人則主持公道替婆婆抱不平，指「老人家真係唔會咁高意識㗎，佢地老咗反應遲鈍啲，聽又唔清楚睇又唔清楚，周圍發生咩事有時真係你兜口兜面話佢地知，佢地先會知㗎」、「個媽媽都認佢自己有『皇后病』，有咁嘅屯門街坊，真係不幸。婆婆本身都唔係有心坐錯位，咁都要鬧人，就算真係2母女分開坐，咪落車先Join（聚）番一齊囉！又唔係話分開咗坐就永遠都見唔到個女」。其他網民抵死回應請瀏覽上圖↑↑↑↑。
巴士爆罵戰相關新聞：
巴士上對罵5分鐘 大把位都爭位坐？ 大媽：咪掗住兩張凳 唔准過界
一輛有大量「吉位」的巴士早前竟爆出爭位風波，兩名女乘客在車上你一言我一語對罵長達5分鐘，期間粗口橫飛。涉事的拍片女乘客更爆出啜核對白：「拿，呢張凳呢個界喺度」、「你唔好掗我呢邊嘅位」、「你畀一個人錢呢，就坐一張凳」、「你自己包晒成架巴士啦」、「小朋友塞住耳仔唔好聽（粗口）」、「人人得以誅之你吖」、「你嗰啲蝦呀、蟹呀攞出嚟吖」。
巴士大媽爭位坐對罵5分鐘逐格睇 ＋ 網民睇唔過眼回應↓↓↓↓
—————
《星島頭條》APP經已推出最新版本，請立即更新，瀏覽更精彩內容：https://bit.ly/3yLrg
