由陳豪、胡定欣、蕭正楠、張曦雯、何廣沛、張寶兒、蔣志光和馬貫東演出的劇集《破毒強人》已經播到中段，昨晚（22日）播出的一集，本來對「文華」陳豪忠心耿耿的「杜飛」馬貫東終被離棄，慘遭「文華」陳豪親手揑死兼掟入天台水廂，相當無情。對「杜飛」馬貫東的死，不少網民留言感不捨留言，甚至還有網民力推他今年榮膺「男飛躍」／「最佳男配角」獎項殊榮。
【相關文章】：死有對証丨馬貫東入行17年首次做男一 要靠「前輩」陳曉華帶入戲
【點擊睇《破毒強人》馬貫東演出】：
對於被網民睇好，馬貫東（Mark）被問會否寄望今年終能勝出男飛躍？馬貫東笑言：「能夠獲得提名嘅藝人，都一定好有實力同有明顯進步，所以參與到競逐獎項已經好開心，能唔能夠攞到就交畀觀眾去決定，邊個拎到呢個獎都係實至名歸。」談到杜飛被文華狠殺，馬貫東笑指場口是「負面情緒大雜燴」：「點解一個咁信任你嘅人，你要佢咁樣為你犠牲？嗰種被背叛嘅感覺真係直插心臟，呢個場口嘅情緒係全套劇入面最豐富嘅，仇恨、無奈、悲傷、絕望，所有負面形容詞一次過喺嗰幕呈現出嚟。杜飛可以為咗文華不惜一切，只要佢一句乜都得，但最後都係被背叛。」
入行以來最辛苦的兩場戲
不過不得不提，還有逃獄以及與殺手泥漿肉搏動作場口，馬貫東坦言是「入行以來最辛苦的兩場戲」，他說：「嗰日非常熱，加上落大雨又濕又焗，喺呢啲情況下拍打鬥戲，真係幾消磨體力同意志。泥漿嗰場更加難，因為啲泥漿搞到個身黐𣲷𣲷，郁動方面有困難，同時又要就住唔好畀啲泥漿入眼，否則會睇唔到嘢。為咗效果，我同對手Peterr溝通之後，決定唔理咁多『實做』，轟轟烈烈咁打場好交，當然我哋做足安全措施，戴晒護膝、護踭同腰封，拍完馬上射水沖身。」談到角色招牌「皮褸」，馬貫東笑言又愛又恨：「件皮褸的確好型，但30幾度加上勁濕嘅天氣，再加埋啲打鬥戲，著住佢真係百感交集、痛不欲生，嗰種痛比起文華畀我嘅痛，係不相伯仲，哈哈。不過睇番觀眾咁欣賞，所有嘢我都覺得係值得嘅。」
三度提名男飛躍鎩羽而歸
入行17年的馬貫東，代表角色除有《愛‧回家》系列的十仔及博士外，還有《那些我愛過的人》的古醫生和《愛上我的衰神》的Santino 等，至今仍有網民「十仔」或「博士」稱呼他，足見角色入屋度，自2016年起，馬貫東曾三度提名男飛躍，可惜均鎩羽而歸。
【其他文章】：
破毒強人丨「安樂」何廣沛失聲原因似曾相識？ 網民即聯想一部TVB經典劇
破毒強人丨馬貫東將罪名攬上身原因曝光 陳嘉輝疑是黑警偏幫出晒面？
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
