9月7日，大致多雲，間中有驟雨及幾陣雷暴。美國ISM非製造業PMI升至54.5，創6個月新高，加上油價持續攀升，美國通脹壓力回升，再有美聯儲委員放話支持加息，美股借勢回吐，道指跌198點，標指跌31點，納指跌148點。
隔晚美股回調主要係市場氣氛略有轉變重磅科技股偏軟，主要係歐盟公佈「數字市場法案」，亞馬遜（美：AMZN）、蘋果（美：AAPL）、Google（美：GOOG）、META（美：META）及微軟（美：MSFT）均被指絕對壟斷，有可能面臨最高營業額10%罰款，令科技股受壓，拖累市場氣氛。
值得留意係市場流動性變化，美聯儲公佈最新資產負債表縮至7.4萬億美元，較去年4月最高峰時期縮減咗1萬億美元，主要係期內縮表所至，按目前每月縮減950億美元計，未來6個月還會再縮減5,700億美元。縮表會令市場上熱錢有所減少，美聯儲縮表1萬億美元，等同債市減少咗1萬億美元購買力，呢個係美債近期轉弱其中一個原因，為咗彌補資金缺口，部份存在隔夜錢中熱錢，開始流向美債市場。市場熱錢減少，美股自然會少咗一份上升動力。
內地經濟復甦動力不足 港股易跌難升
港股一直死死下，問題正正係市場流動性不足，當香港銀行體系結餘由去年3,300億元，逐步流出，減至目前不足5,00億元結餘，港股成交亦跟隨萎縮，升市無人追，跌得勁亦無人願沽，買賣兩閒，變成一潭死水。港股噚日受人民幣創今年新低影響，跌至18,200點見支持回穩，收市跌幅收窄至7點，暫時叫守住10日及20日線，但成交回落至929億元，繼續水清無魚。
阿爺雖然使出組合拳，但內地經濟復甦動力不足，加上美元近日持續轉強，令人民幣兌美元滙價昨日跌穿7.32關，係去年11月以來最低，一日人民幣無法回穩，港股受拖累下易跌難升，今日若失10日線20日線，後市都係瓜多過菜。
相關報道：
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
