星8卦｜「皇帝」「沙聲」入戲深愛得真 老婆開綠燈三人行止流言
有無發覺「皇帝」跟「沙聲」仲有「皇帝」個老婆成日都三人行？呢招真係要服晒老婆嘅絕橋。因為「皇帝」份人比較文藝，自細就識咗老婆，佢對愛情有非一般男人嘅幻想，所以好快結婚，表面真係恩愛，實質佢都係個好男人，對家庭負責任。
問題係太早結婚，對外面嘅誘惑未見盡，難免定力差啲。尤其連續幾次都係同「沙聲」扮情侶，仲要無乜邊次大團圓結局。唔知係咪入戲太深，兩個人愛到要生要死，完全抽離唔到，所以返到屋企都有啲痛苦，「皇帝」係咁，「沙聲」啱啱又甩拖，情況就更不能自拔。老婆睇到心裏有數，於是開始叫「沙聲」得閒嚟屋企食飯，同啲小朋友一齊玩，做埋契媽。佢亦好大方畀「皇帝」做佢心靈伴侶，就算明知兩個人有時會一齊過夜，佢都同「皇帝」講只能夠「沙聲」一個，兩個人搞乜都隻眼開隻眼閉。
老婆嘅心態多個人幫手管住「皇帝」都唔係壞事，而且「沙聲」名氣夠大，絕對唔失禮，如果要揀，佢情願有個咁高質嘅情敵，甚至將佢成為自己嘅家人，出出入入都係三個人，外界又唔會講乜嘢閒話，阿Q地覺得自己係大贏家。
【相關文章】：
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
