獨家丨裕美不忿林作出事被網民瘋狂恥笑「抵死」撐男友善良低調幫基層學童補習

上周，裕美貼出溫馨家庭照，開心分享和媽媽赴日尋回生父，一家人失散23年終能重聚，搞喊唔少香港人。不過，裕美話咁快由天堂跌落地獄，男友林作於前日（18日）捲入虛擬資產交易平台「JPEX」無牌風波，以涉嫌「串謀詐騙」被捕。獲讚「最佳女朋友」的裕美24小時stand by隨傳隨到，她不忿網民恥笑林作抵死又指罵男友人格，稱林作做好事唔會宣揚，「唔係攞張支票喺電視現身做慈善就係好人。」裕美坦言經此一役林母都希望林作低調啲，又稱擔心男友：「自己長期冇得瞓。」　採訪：方騫平攝影：鄧國良

裕美近日心情好似坐過山車，一家團聚都未開心完，又到男友被拉。

林作被捕，裕美奔波得冇覺好瞓。

裕美成功尋父，兩父女經常短訊聯絡。

裕美眼中林作係好人。

裕美被封「最佳女朋友」。

上周一，裕美在林作的半山豪宅受訪，大談返回日本德山鄉下尋父的艱苦經過，表示尋父啟示早於去年底上載社交網，有熱心網友找來其父和田具久的Twitter帳戶，可惜聯絡不上（原來朋友為裕美父開acc後，老父唔識用），之後裕美母親在陳年記事薄內搵到20年前裕美父的手機號碼，由居日朋友代為聯絡上，但裕美父懷疑係騙案，即使跟裕美母女講咗45分鐘電話仍婉拒見面，最後和田具久睇到裕美有關尋父的香港報道，才打破僵局。

裕美一家失散23年終能重聚，賺人熱淚。

見返爸爸同媽融洽相處，彌補返以前唔好嘅回憶。

去年裕美在網上廣發尋父啟示。

有熱心網友找到其父的Twitter帳戶。

小時候裕美經常喺門邊偷聽父母狀況，隨時撲住做和事佬。

裕美(第二行右1)曾喺日本時求學讀幼稚園，當時係肥嘟嘟可愛小女孩。

裕美媽媽年輕時好靚女。

裕美小時候和爸爸合照。

一家團聚死而無憾

失散23年終一家團聚，裕美好開心：「見返爸爸同媽媽嘻嘻哈哈相處，彌補返以前唔好嘅回憶，印象中佢哋成日為家庭瑣事發生衝突，我年紀細細去充當和事佬，驚到等父母瞓晒先敢瞓。」另外父母雖然分開多年但並冇離婚，兩老多年來亦冇另一頭家，絕對是大團圓結局：「所以我死而無憾，所有嘢都唔再重要，包括知名度、金錢、婚姻。」她又指同爸爸有血緣關係，一定親過林作。

型男老父和田具久到車站迎接兩母女。

兩父女好Sweet。

裕美翹實爸爸爸。

爸爸帶裕美返回兒時到過嘅葡萄園。

裕美打算在日本置業，讓爸爸安享晚年。

裕美送手作銀包畀爸爸，林作冇份。

做人梗會有高有低

對於林作近日再惹官非，裕美表明一定會企佢嗰邊撐到底，患難與共，更有感而發：「每個人都有高高低低，唔會一世都一帆風順，都係一個歷程啫，人生好短暫，冇乜嘢係過唔到嘅！如果身邊朋友，甚至伴侶出咗事而離棄佢，咁樣做人好『狗』。唔好講我，連佢嘅朋友都話『有咩幫手出聲』。」問到點支持林作？裕美都幾擔心，「唉！好多嘢都愛莫能助，最重要我唔會畀壓力佢，唔會問長問短煩佢，當佢有需要幫手，會stand by照顧佢。」

裕美表明撐林作撐到底。

前日，林作涉嫌「串謀詐騙」被商罪科探員帶走。

一收到call，裕美即送叉燒飯到警署。

昨晚裕美到警署保釋林作。

獲讚「最佳女朋友」的裕美24小時stand by隨傳隨到。

個個鍾意「剝花生」

多口網民笑裕美「搭錯車」，她強調感情事，外人冇資格評論：「以前我勁多男朋友都郁手郁腳打人，佢冇對我郁手、冇對我唔好，兩人之間相處最清楚，有好多人表面紳士到爆，個個都覺得佢好好，但私下係兩回事。」她眼中嘅林作心地善良，只不過係配合social media先表現得譁眾取寵，迎合大眾口味，「最近喺街有家長同我講，話好多謝林作幫佢子女免費補習英文，呢件事佢冇向我『晒命』，連我都唔知，更加唔會對外講啦，呢啲咪好人做嘅嘢，唔係一啲扶完阿婆過馬路再喺網上公開講，攞張支票喺電視現身做慈善。」對於網民鬧爆林作「抵死」，裕美認為𠵱家社會風氣鍾意「剝花生」，唔再care好人好事，更力斥網民恃住匿名，刻薄留言不用負責任。