獨家丨40歲王嘉明被嘲一身肥肉：肥唔唱得歌? 「光頭仔」變單親爸爸挑戰《中年2》

「光頭仔」王嘉明在84年經典港產片《最佳拍檔之女皇密令》中跟麥嘉拍住上，當年的可愛童星話咁快40歲，闊別樂壇20年的他為延續歌星夢，決心挑戰《中年好聲音2》，唔介意被取笑肥腫難分。另外，回顧昔日童星生涯，他自爆當年拍咗3套戲已賺到幾十萬，80年代非常厲害，加上得到陳百強、張國榮及徐小鳳等巨星愛錫，童年已大豐收。採訪：方騫平

王嘉明經歷過流離浪蕩嘅歌手生涯，學會調整心理質素。

當日「光頭仔」形象，令王嘉明深入民心。

40歲的王嘉明仍然有歌星夢。

賽前跟編曲及音樂監製方樹樑惡補。

努力練吓歌做好準備先。

王嘉明在《中年2》海選中演繹張學友的《愛是永恆》，成功晉身100強。他在內地開直播唱歌時，被網民追問點解肥咗咁多？他秒回：「食咗20年飯，唔肥咪嘥咗？」對於網民將他跟小時候的「光頭仔」比較，他啼笑皆非：「其實『光頭仔』都係我嚟，鍾意佢，唔鍾意𠵱家嘅我唔緊要，聽吓我唱歌先。」從商多年，兩子單親爸爸王嘉明零包袱，勇敢反擊：「唔一定要減肥先可以唱歌呀？唔係個個歌手都瘦到一碌竹啫，又唔係核突到令觀眾要轉台，我冇諗過要做偶像，只係想唱出我嘅故事，希望得到共鳴。」

仲有團火嘅王嘉明，挑戰《中年2》圓歌手夢。

為配合演麥嘉兒子，王嘉明多次剃頭做「光頭仔」，好彩長大後頭髮好濃密。

40歲王嘉明係單親爸爸爸。

唱片部倒閉好難受

40歲的王嘉明仍然有歌星夢，他為了唱歌，未夠18歲已賣身黃百鳴旗下的東方影業，由演員做起，至2002年公司成立唱片部，並為他推出EP《公告天下》，宣傳期未完，唱片部因蝕錢摺埋。當年他感到好委屈難以接受：「見同期歌手麥浚龍、余文樂、Cookies個個趁年底『劈』獎（即爭獎），明明自己勢頭好變乜都冇，我嬲到將Band房啲樂器捐晒出去，唔再玩音樂，仲同歌唱老師陳潔靈訴苦，老師鼓勵我先轉做其他嘢賺錢，『到時仲有團火，返嚟唱歌冇人會阻到你！』呢句話我記到𠵱家。」

雖然曾跟黃百鳴有合約糾紛，王嘉明稱已雨過天青。

王嘉明於2002年出過《公告天下》EP，收錄熱播歌《分手》。

王嘉明歌手生涯唔夠一年，宣傳期未完，公司唱片部已摺埋。

2002年樂壇湧現大量新人，同期有Cookies、陳冠希。

童星生涯有血有淚

王嘉明回顧做童星日子有血有淚，3歲時喺4樓「吊威吔」拍跳樓戲，雖然跌落去一刻係用公仔(遠鏡)及由柯受良7歲兒子做替身，但他仍嚇到喊足一日，完全唔enjoy；直至拍到第3套戲，因為在片場吸得太多混濁空氣，搞到肺炎要停拍，埋單計數連分紅都賺咗幾十萬，「雖然冇乜讀過幼稚園，但『光頭仔』好受歡迎俾紅星圍住玩，片場留有唔少難忘回憶，如張學友帶過我睇佢演唱會；陳百強送紫色衫及最愛嘅加菲貓公仔畀我；我又去探過哥哥班，睇佢拍《英雄本色》；甚至喺新西蘭拍《千里救差婆》見個靚景。」

3歲王嘉明拍《最佳拍檔之千里救差婆》跳樓戲。

「光頭仔」王嘉明在84年經典港產片《最佳拍檔之女皇密令》中跟麥嘉拍住上。

「光頭仔」王嘉明好可愛。

王嘉明細細個已識演戲。

小鳳姐都好錫小嘉明。

當年陳百強好錫王嘉明。

被丹尼仔攬到實。

陳百強送「光頭仔」唔少禮物，包括加菲貓手偶公仔。

王嘉明細細個就鍾意哥哥，仲會去探班。

當長大後重返影壇，王嘉明唔再被全世界圍住嚟轉，所以想唱歌做台上主角，他又爆當年麥浚龍在台上掟肖像公仔時，余文樂對台下fans說：「快啲執，錢嚟㗎！」作為生意人的王嘉明深明此乃市場推廣策略，更笑說：「經歷3年疫情，大家知道柴米油鹽嘅重要性，𠵱家要拉票嘅話，我一定會掟粟米油及掟包米落台，相信一定會有人搶，掟唱片落台唔會有人吼。」