10月4日，部份時間有陽光，天氣酷熱，下午局部地區有驟雨及雷暴。美國8月職位空缺大幅回升至961萬份，10年息衝上4.81%，美股三大指數回落，道指跌430點，標指跌58點，失守4,300點重要支持，納指亦跌248點。VIX升穿19點，恐慌情緒升溫，目前環球焦點均落喺10年債息身上。目前標指平均市盈率為24倍，回報率為4.16倍，低於10年債息4.81%，令美股短期下跌壓力增加。

目前市場對息口走勢睇法分成兩派，對沖基金自惠譽喺8月中下調美債評級後，大大力沽空美債，賭佢美國赤字增加，債務高企，加上9月份工會罷工，沽空嘅對沖基金認為此舉將拖垮美國經濟，全球最大對沖基金橋水認為，美國要將通脹壓抑至3%問題不大，但若然美聯儲堅持要實現2%通脹率，必然要繼續加息，經濟或需要付出沉重代價。

另一個市場睇法係以細摩為首嘅傳統資產管理基金，表示目前開始要建立美債長倉，理據係美國經濟明年增長將放緩至1.1%，通脹則回落至3%水平，當經濟急速放緩，明年聯儲局就會開始減息，幅度為每次25點子，一共減四次，所以目前係買入美債嘅最佳時機。

恒指創今年低位

實際情況係目前美國經濟無以前預期咁差，主要係疫情期間美國實行貨幣寛鬆政策，美國政府大灑金錢，民眾手頭鬆動，美股自然節節上升。雖然過去幾季美企盈利有所倒退，但實際業績都好過期，呢個亦係支持美股由舊年10月底位，標指由3,500點升至早前4,600點水平，PE高位達26倍，唔少股份股價更升一兩倍，目前相對美股嘅吸引力，已不及美債息嘅4.6%，呢個正正係美股近日開始作出較大幅度回調嘅原因。

至於港股真係不提也罷，假期前挾淡倉，單日升400幾點，但噚日假後返嚟又走樣，恒指跌500點打回原形都唔止，更創今年低位。雖然隔晚美股急跌，但ADR及夜期未有跟足美股跌幅。雖然今早黑期靠穩，但噚日回補去年11月29日裂口17,300點後，未能重返17,500點水平，估計今日港股繼續偏軟，短線下試17,000點心理關口，17,000點水平好友將力守，不過反彈力有限，之前嘅17,300點至17,400點支持，將成為今日即市反彈阻力。

相關文章：

港股市況｜憂美續加息 港股低開64點 地產股續弱 新世界逆市反彈逾3%

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ