黃妍（Cath）受村上春樹作品《1Q84》啟發，創作一系列與文學有關的音樂作品，推出第3張專輯《4891》，更與填詞人王樂儀合寫小說，不過Cath怕壓力大，冇打算做作家。講到AGA早前驚爆婚訊，31歲的Cath強調不會步後塵，反擔心冇人要。採訪：杜杜 髮型:Billy Hai@Alex’s Team 化妝:Yu Tsang@Jessica’s Team
兩年前，Cath向王樂儀推介《1Q84》，因而展開《4891》專輯企劃，「當時樂儀覺得單係用『兩個月亮』做歌名已經好勁。」兩年間她還創作多首取材自文學作品的歌曲《飛鳥集》和《7月24日大道》等，而推出《4891》兩周前，她還有新挑戰，「我哋喺日本拍埋MV，覺得有本50幾頁嘅小說，去配合專輯更好，於是我同樂儀就以男女主角書信往來形式去寫，雖然好困難，但成件事好夢幻。」
中學曾有作家夢
出道以來，愛以文字配合作品推出的Cath，曾有一個作家夢，「中學時好興網絡小說，我嘗試過寫，但通常一個單元之後就冇寫落去，因為開頭條橋唔夠好，去到中間就會厭惡，救唔到就決定放棄。」不過她已不敢再想做作家，「有出版社問我寫唔寫書，都唔知要寫咩，真係出書做作家，個朵太強勁，好大壓力，𠵱家算過咗個作家癮就夠。」
講到AGA（江海迦）爆婚訊，亦被嚇親的Cath笑言難步後塵，「我入行無耐到𠵱家都係單身，因為太耐冇拍拖，有啲唔識得同異性相處，反而會怯㗎！」她又坦認本身太宅難搵對象，「入行後圈子越嚟越窄，更加難識新朋友，都唔知點算好。」偶像是周杰倫和盧廣仲的她，絕非外貌協會成員，對象最好有才華，高度亦有要求，「某方面你叻過我，已經覺得你好有才華，但最好有1米8高，我攬落去就係佢心口位。」
《星島頭條》新網站有更多精彩內容：http://www.stheadline.com/
