10月12日，部份時間有陽光，係一個風和日麗嘅日子。聯儲局官員連番放鴿，美股已連彈四日，道指再升65點，標指跟納指分別升18點及96點。以前多次提到標指4300點係一個重要支持，果然呢個位都幾守得，但估計去到4,400點至4,450點又再度返覆。暫時美股再炒減息概念，呢個概念都炒咗兩季，雖然美國經齊未完全回復至疫情前，但標指已從3,500點反彈至4,400點水平，升幅超過兩成，而個別股份更升五成甚至一倍，其實美股現價估值一啲都唔平，但憧憬未來兩年減息，經濟回復活力，企業盈利回升，美股早已偷步炒上，信未來兩年美國經濟漸入佳境，美股只能貴買貴賣。

美股焦點目前當然仲係講緊個債息，但企業盈利都相當重要，Q1標指盈利同比下降只有3.1%，遠比年初預測降幅達5%甚至更多低，結果帶來美股報復式反彈，反映美國經濟未如預期咁差，嗰啲美國經濟陷入衰退嘅言論，更加係不攻自破。至於去到Q2，企業盈利平均下跌6.5%，亦係合符預期，估計Q3喺營收輕微增長下，盈利有望增長5%，Q4進一步回升至10%以上，其中科技股經過裁員潮後，成本大降盈利復甦應該更為強勁。

呢個星期五銀行股將為新一輪美企業績期揭開序幕，由於經歷3月份嘅銀行危機，估計壞帳撥備上升下，盈利表現麻麻，但唔少銀行股嘅股價已回落至近日低位，若然業績出嚟唔係太差，唔排除有資金偷步抄底。即管睇睇嚟緊美股業績期，美股點樣發展。

暫未見外資重新入場

至於港股呢邊似乎有啲轉勢，港股連升五個交易日，成功突破10日及20日線後，隔晚於ADR再升近250點。主要係前日收市傳出中國準備再出招刺激經濟消息後，今次阿爺唔係淨打嘴炮，噚日「國家隊」匯金公司入市增持四大國有銀行A股，雖然只係5億左右，但係自2015年8月以嚟再次入場，意義重大。雖然暫時未見外資重新入場，但至少淡友會先收歛，港股亦可借勢繼續挾升。

從技術面分析，恒指由17,094點反覆回升，踏入10月除月頭兩個交易日下跌，至今已連升五個交易日，今日預期隨隔晚做好，若成功挑戰50日線，18,249點企穩，有條件進一步向100日線18,702點推進，而呢個位剛好亦係9月5日下跌裂口18,725點至18,789附近。若然未能企穩50日線，即市回調支持位係18,050點至18,150點左右。

相關文章：

港股市況｜國家隊入市利好 恒指高開365點 工行升逾4% 舜宇大漲8%

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ