10月17日，大致多雲，有幾陣雨，天氣開始轉涼。美國總統拜登考慮到訪以色列，市場憧憬以巴局勢緩和，雙方戰爭或能受控。雖然其後以色列否認停火，但美股喺避險情緒再度降溫下，隔晚顯著做好，道指一度升逾400點，全日升314點收市；標指跟納指則分別升45點及160點。反映中概股表現嘅金龍指數反彈0.32%，帶動港股喺ADR及夜期回升。美股又借業績期炒上，預期標指到4450至4500先會有較大阻力，而VIX則回落至17.2，美股要繼續向好，VIX最好要回落至17以下，否則美股表現只會反覆。

美國10年債息略為回升至4.7227厘，2年債息則升至5.0964厘，主要係市場有分析指中東局勢未明朗，而局勢發展或左右美債息走向，一旦雙方衝突升級，或刺激通脹上升，令息口高企，相反以巴形勢改善，則有助美債息回落，而隔晚再有聯儲局官員放鴿。加上美國財長耶媽接受訪問時指，雖然利率仍持續高企，但美國經濟形勢良好，聯邦債務利息開支仍然可控，市場解讀為利率未必需要再進一步上調。

雖然早段蘋果公司因為iPhone15於內地銷倩欠佳，股價一度跌1.3%，但尾市跌幅收窄至0.1%，反映美股估值即使便宜不再，資金卻願意逢低吸納。而運動服股份Lululemon獲納入標指成份股，股價急升逾一成；同類體品股Nike則升2.1%，為表現最好道指成份股。不過有消息指卡塔爾財團退出競購英超球會曼聯，曼聯股價應聲下跌一成。

市場避險情緒降溫，而且傳聞指美國證交會快將批准發行可直接投資加密貨幣交易所買賣基金（ETF），比特幣曾炒高一成，重返3萬美元之上，其後升勢回順，收市僅升3.4%，反映避險情緒確有緩解。
至於阿爺繼續出招，收緊沽空條件，可惜A股全無反應，外資繼續錄得淨流出。內地仇外情緒強烈，撞啱人地外資去中國化，唔想再依賴中國生產線之餘，亦減少在華投資，既然你中國仇外，人哋外資走出中國更為心安理得，毫無顧忌。

中國一向係對外型經濟，外資肯投資，中國先有得着，相反仇外情緒下，進一步趕走外資，對中國有害無利。就算講乜嘢內需內循環，都要先賺咗外資嘅錢，先有閒錢花費，外匯賺唔到，又何來刺激到消費，得把口講嘅內需內循環，都係得個講字。

預期今日指數可以收復20日線，約17700點水平，呢個係即市支持位，但上周四形成嘅島形頂令回調壓力大，甚至係預視呢一輪反彈浪嘅完結，若今日未能重返周三底部，大約係17900水平附近，20日線能否守穩都成問題，短期要重返萬八關更難，一旦再失守10日線及20日線，料再向下尋底，前底17100不容有失，否則下一個支持位要去到16500至16800水平。

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ