10月19日，多雲，有驟雨，早晚有涼意。以巴衝突再度升級，以色列空襲加沙的醫院造成重大死傷，油價反彈至88美元，10年債息升至新高，美股壓力重重，三大指數顯著下跌，道指跌332點；標指跟納指分別跌58點及219點，VIX回升至19水平之上，留意會否重返月初高位20.88，不過標指於4300點應該有唔錯支持，去到呢啲位，都會有買盤跟進。
大摩係壓軸公布業績嘅銀行股，結果營收及盈利雙雙不及預期，股價大跌6.7%，打擊市場氣氛。另一業績焦點Tesla，第3季收入只增長9%，又係差過預期，反映需求開始放緩，盈利大跌37%，較預期跌28%多。以目前Tesla超過60PE嚟講，呢個業績為估值帶嚟唔少壓力。過去兩季Tesla公布業績後，每次績後都插10%，今次績前已先偷步跌4.76%，盤後再跌4.24%，加埋又係大約跌咗一成左右，當股價跌至200至230美元，會有一定吸引力。
至於嚟緊將公布業績嘅台積電唔會好得去邊，因為三星電子已連續兩季業績大跌，預期台積電營收將減少兩成，盈利將倒退三成。重點要睇管理層對第四季業績有乜嘢睇法，而蘋果iPhone 15喺中國銷量放緩，可能向下修訂對台積電嘅落單數目。不過目前台積電嘅PE降至15倍左右，一旦股價再回落，其實係長線投資一個配置好機會。
不過美股今年上升咗唔少，今年投資美股已較去年困難，尤其係息率高企下，債息已拉升至5%以上，債息較高嘅回報率，大大減低偏高估值美股嘅吸引力。目前美國股債表現由息率走勢主導，美股暫時宜守不宜攻。
至於港股維持弱勢，阿爺連環出招，甚至派國家隊入場，A股仍然未見起色，加上美股回調壓力漸增，令本來弱勢反彈嘅港股再度腳軟。隔晚反映中概股表現嘅金龍指數跌2.2%，港股噚日再失10日線，隔晚於ADR再跌近200點，回落至17500至17600水平。預期今日港股再失20日線約17640後，將回試上周一低位17447，而再失10日及20日線後，17,600至17,700由支持變為阻力。一旦跌穿上周初低位，睇怕早前嘅年低位約17,100水平難保，有機會喺10月份內再穿底，17000為心理關口支持，跌穿17100水平，下一支持為16800。
相關文章：
---
星島X理大攜手推動永續發展 「ESG認證計劃暨嘉許禮」2023 把握報名機會 https://bit.ly/45kDhn5
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
