辛度東拿利正接受關於賭波的調查。Reuters
意大利賭波門案，或許在香港不是太受關注，畢竟現時球迷都將注意力放在英超幾隊和為數不多的球星身上，若非暫時的被調查球員之中，有兩個效力紐卡素和阿士東維拉，可能直情沒有報道。
不過，不論在香港或意大利當地，受查的祖雲達斯球員法佐利，甚至唧牙膏式越認越多的辛度東拿利都未有受網民太多批評。
我認為有趣的是球迷和網民一向都係律人以嚴，待己以寬，例如會怪責年輕球星唔自愛，喜愛夜蒲，晚晚換女伴，唔講你會以為8成人口都係長期處於「聖人Mode」之中。試問，若果你二十歲出頭，身家過億的話你會唔玩？ 不過，網民就係咁，因為無幾多個真正試過搵咁多錢，唔會有同理心。
不過今次則不同，唔少人都曾經參與賭博或賭波，年輕時跟一起踢波的波友坐埋都會講吓賭波啦，自己都賭波自然唔好意思對賭波的球員口誅筆伐，因此唔少球迷都對犯錯的球員反而深表同情。正如意大利足總主席都話：「我們國家每年從賭博收入150億歐元，球隊和球場廣告都充斥博彩公司的訊息，你叫我們如何苛責這些年輕人？」
在意大利，職業足球員不能下注足球，但喺青年軍之中，又有多少人能成為職業球員，一「夠秤」已下注緊足球啦，到成為職業球員，難道就能立即唔賭？馬高
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
