第五波疫情期間，榮源茶行太子女王詩雅染疫後，涉嫌向衛生署謊稱由家出發前往「洪門宴」。王詩雅否認4罪受審，惟自上周二於九龍城裁判法院大樓門前跌倒受傷後一直缺席聆訊，直至今午，王詩雅由他人攙扶到庭作供，提到案發時一日接逾30通電話，當中醫護人員佔十數個，另有媒體來電「扮客人來關心，講唔到幾時接觸過先知道」，故難以肯定「究竟係衞生署職員，定媒體打來扮衞生署職員？」
辯方代表大律師黃繼兒主問下，王詩雅交代2022年1月6日早上9時半致電衞生署人員補充行蹤，約1小時後有人自稱衞生署護士來電核實詳情。王詩雅憶述約10時50分有女聲來電指「張竹君醫生有嘢問你」，其後轉交另一女士「自稱張竹君醫生，問我係咪王詩雅」，王反問「我點樣去肯定你係張竹君醫生？」王詩雅開始結巴複述對方稱「我呢年幾兩年都幫政府做新，新，新聞記招發佈會，你應該喺電視都聽過我把聲。」王續指當時「我就好直接答佢我平時好少睇電視，所以認唔到你把聲」，對方再指「你總會有聽收音機，總會喺其他聲音渠道聽過佢把聲」，王又反駁指沒有收聽電台習慣。
王詩雅續指對方問「你想我點核實身份畀你」，王回應「我係市民，呢，呢一part應該交畀你哋政府去諗，而唔係要我提供埋方法畀你哋」。對方再問何以不信，王答「我好難相信因為尋日同你講嘅嘢，轉過頭已經喺媒體上面出現，今朝早仲喺媒體收到自己嘅confirm number （確診編號）⋯⋯我嘅confirm number係由記者同我講，而唔係由衞生署同我講，噉我點信你哋任何一個打來話自己係衞生署嘅人就答你哋」。對方後來問及生日派對主人翁電話號碼時，另外問到「場入面係咪重有其他高官喺度？」意指政府主要官員，王回應指所知者已全數披露。
王詩雅今指1月7日「個人瘟瘟沌沌，有幾聲咳有痰」，當日多次向來電衞生署或防疫追蹤人員交代行蹤，指1月3日早上去按摩之後，乘的士到中環公司店舖，逗留至傍晚6、7時，再步行15至20分鐘到IFC city’super購買禮物，之後再因為獲介紹友人想購買茶葉，遂乘的士到干諾道西155號，google顯示即高樂花園附近，由朋友引領到場，逗留了不足1小時，9時半前離開並一同乘車到達生日派對。
王詩雅提到1月6日逾30通電話中，醫護人員佔約十數個，問及醫護身份時則獲回應指「總之你答我哋問題就得㗎喇」，除張竹君外問及其餘人職員編號及姓名時一律不獲回應。王詩雅多番指另外有媒體在政府記招前早午間來電，甚至還會WhatsApp 來電，有些人來電時「初頭冇講係記者，講多兩講後尾先承認係記者」，有些則「扮客人來關心，講唔到幾時接觸過先知道」，結果「好多時講完之後啲新聞就出咗街」，故難以肯定「究竟係衞生署職員定媒體打來扮衞生署職員？」
被告王詩雅被票控4項「明知而向獲授權人員或衞生主任提供任何在要項上屬虛假的資料」罪，於2022年1月6日至7日向衛生署職員辛麗芳、賴潔生及衛生主任張竹君，虛報於2022年1月3日中午至晚上的行蹤。
法庭記者：陳子豪
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
