前香港代表隊中場歐陽耀冲正式結束日本之旅，今季在日丙球隊岩手盛岡仙鶴未能落場，最終赴日3季未能得到出場機會。雖然如此，歐冲表示日職之行仍是收穫良多，希望之後回港再和外界分享，甚至爭取再次在港落班繼續踢波。
歐陽耀冲於2021年加盟日丙YSCC橫濱，兩季未能出場，今季轉投另一日丙球隊岩手盛岡仙鶴，最後仍是未有出場機會，在球季結束後，他在周一網上發文，宣布正式完結日本之旅。
歐冲目前34歲，他表示仍未決定下一步去向，但肯定會先返香港，能否再在任何組別的香港球隊落班則要再看機會。歐冲在日本幾年累積人脈，除了在港開設日式足球學校之外，也介紹了前日本青年軍神田夢實來港，這位球員現時已是港超標準流浪主力。
歐陽耀冲網上撰文：
日本足球生涯正式結束，到最後都無得出場，十分抱歉大家一直對我嘅期望。
知道大家一直都想睇到我比賽，但我為左自己夢想黎到日本發展，呢三年內，我已盡了力，無任何遺憾，原來人生有時吾係努力就做到，但我能夠加入到j league球隊已經完成左我由細到大嘅夢想，雖然出吾到場，係好可惜，證明日本足球真係十分嚴格先有咁好成績，但我已經滿足，因為呢三年係日本學到同見識到好多，希望有機會係香港同大家分享。
現家未知下一步係點，之後會吾會繼續踢職業足球都未知，但仲好想落場比賽，所以無論咩組別都好，我會繼續踢落去，繼續享受足球，所以十分歡迎香港球隊搵我。
好多謝咁多年一直以來無論支持同吾支持我嘅球迷們，因為係香港做足球員，有人認識係十分困難，希望大家繼續支持香港本地足球員，有緣球場上再見大家。
最後講少少自己呢三年係日本嘅感想：
1.自己係j league作為外援能力不足。
2.香港足總應該嘗試同日本足總合作，例如j league每一隊都有東南亞外援名額，如果香港能夠加入，機會相對比較容易。
3.球員背後的支持和贊助，例如泰國球員猜拿貼，當時加入北海道札幌果時背後已經有大量贊助，去到球隊果時已經有翻譯，同球隊溝通方面無問題，但香港球員要靠自己能力去做所有事，十分困難。
4.可能球隊教練係外藉教練會容易有機會
5.球員愈年青黎愈好，適應更加快，而教練喜歡用年青球員。
以上純屬小弟感想，希望之後可以幫助香港球員係J League比賽出場。
_____________________________
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
