獨家丨48歲佘詩曼唔強求姻緣：冇咪冇囉演「Man姐」太惡馬明嚇親震住「投訴」

兩屆「視后」佘詩曼相隔6年重返「娘家」拍台慶劇《新聞女王》，霸氣「Man姐」一角獲讚演技老練兼超班，熱捧為視后大熱門。久未在港宣傳的阿佘興奮自爆拍攝時好入戲，更曾嚇親馬國明及鄧智堅。她堅持演出入肉並非想打低鄧萃雯成為首三屆視后，只想開心地省靚自己「招牌」。至於芳齡48仍然單身，阿佘答得輕鬆，「有咪有，冇咪冇囉。」採訪：方騫平攝影：譚志光化妝：Katherine Lo 髮型：Lorraine Lam @ Hair Culture 服裝：Marni 造型：Christina Hsu 場地﹕TIRPSE@K11 Musea

阿佘經常被「內容農場」老屈，多到已經唔記得內容，但佢有檢討自己。

阿佘紅足26年有名又有利。

阿佘只有小遺憾，係多年嚟冇時間學滑水及滑雪。

阿佘因為容易滿足，故每一日都好開心。

1997年港姐季軍入行的佘詩曼，在TVB共奪11個獎成為全台NO. 1，雖有豐富演戲經驗，但她坦言「今次好有難度」，皆因每個人都睇過新聞報導，要令觀眾覺得她做到一個似模似樣嘅新聞主播唔容易，除事前熟讀劇本做足功課，亦曾跟監製到新聞部考察，坐上主播枱體驗20分鐘，但她還嫌練習不夠，主動要求加時，於新聞部的模擬新聞中心努力操練聲線、語速、語氣、表情及坐姿等。

《新聞女王》中，阿佘霸氣「Man姐」一角獲讚演技老練兼超班。

就算係拍現場新聞報導場口，都曾考起阿佘。

拍前阿佘曾跟監製到新聞部考察，坐上主播枱體驗20分鐘。

阿佘1997年參加港姐的問答環節中，霸氣對曾志偉話唔會落選，最後贏得季軍。

演得投入絕非為獎

阿佘自爆演「Man姐」太投入，兇狠地發完惡，劇組嗌Cut機後，對手馬國明及鄧智堅忍唔住「投訴」佢：「嚇死我喇…Man姐」，阿佘聽完啼笑皆非：「咁嗰場戲要咁嘛，其實佢唔係惡係揸緊原則，堅持嚟做嘢唔係識朋友。」語畢馬上澄清現實絕對唔會咁樣對人。對於演到被對手「詐型」，是否想刷新紀錄成為首位3屆視后？她笑說冇諗咁多嘢：「只要角色能深入民心得到認同就算成功，套戲做到有口碑及討論性經已係最大得著，過程比獎項重要，不過，我重視每個獎項，亦多謝大家支持。」

阿佘演繹「Man姐」七情上面，惡到嚇親馬明。

佘詩曼、馬國明為權鬥火拼。

阿佘對住馬明眼神好狠。

不時互窒。

阿佘對住馬明好凶狠。

劇中佘詩曼、馬國明好有發揮。

阿佘強調真人唔惡。

阿佘由雞仔聲新人變兩屆視后，付出唔少努力。

阿佘重視每個獎項，唔會讓獎畀競爭對手李施嬅。

力撐何廣沛冇肚腩

對於床戲對手何廣沛被網民彈肚腩摺起唔夠fit，阿佘忍唔住大平反：「何廣沛瘦到死邊有肚腩呀？其實佢好努力，好佩服佢嘅意志力及堅持，為咗瘦身拍床戲，食咗3個月烚雞胸，更完全唔受『萬歲』嘅美食引誘。」至於何依婷被評戲屎，她認為如果演得唔好，就唔會有咁多話題性，仲讚佢係一個聰明嘅女仔：「合作第一日見佢有啲緊張，加上未摸熟角色有啲未進入狀態，當提咗佢兩日唔好用錯重心，之後開始有進步。」她強調新人一步步行上嚟係要有階段，正如她1999年首次拍劇《雪山飛狐》擔正女一演「苗若蘭」，亦曾被狠批唔識做戲及雞仔聲難頂：「聽完負評梗係會唔開心啦，既然簽咗約要繼續做，唯有想辦法改善。」

阿佘親證何廣沛為拍床戲減到過瘦，冇可能有肚腩。

阿佘好佩服何廣沛嘅意志力及堅持。

阿佘大讚何依婷一點就明，越拍越進步。

阿佘在處女劇《雪山飛狐》被批唔識做戲及雞仔聲難頂。

一個人絕對唔孤單

48歲佘詩曼紅足26年有名又有利，提及目前人生目標，她答得輕鬆：「開心及健康就夠，更何況自己鍾意做嘅嘢變成事業，經已好快樂，仲想點呀？至於有冇終身伴侶反而好隨緣，有咪有，冇咪冇囉，唔會刻意強求，係你就係你㗎喇。」她堅稱絕不孤單，更霸氣地說：「我每一日都好開心，因為容易滿足，活在當下，正如當年喺沙漠拍《火舞黃沙》，風沙餸飯都係有趣經歷，能夠做到開心嘅嘢自然唔覺辛苦，唯一遺憾係多年嚟冇時間學滑水及滑雪，感受唔到好free嘅感覺。」