星8卦｜「阿太」心野想搞不倫戀上位 被「無敵」直白踢爆收皮冇癮
咪睇「阿太」真係好似良家婦女，都話好似，所以都係一場演技。「阿太」好細個就同「叮噹」一齊，奉子成婚之初，兩個都冇乜錢，好彩「叮噹」之後遇到伯樂，將佢培訓又畀機會，總算養得起頭家。問題係「阿太」未見過乜嘢世面，所以喺「叮噹」紅咗之後，開始見識到世界好精彩。
「阿太」覺得自己唔夠靚，年年月月都去微調，成個樣變晒，但「叮噹」又真係唔介意，畢竟老婆陪自己捱過世界。「阿太」唔知足，見到「無敵」人氣勁，又好似同「造型」唔多妥，無乜感情，成日搵機會喺大場合勾搭「無敵」。可能佢份人係人都講得兩嘴，一吹就兩三個鐘唔停口，「阿太」捉錯用神以為佢對自己有意思，所以諗多咗。
「無敵」結婚前係誇張啲，同時期有兩三個，但自從同「造型」奉子成婚後，成個人變晒，只不過「造型」份人好慢熱，唔會喺人哋面前晒恩愛，江湖咪成日傳兩個唔掂。好衰唔衰「阿太」收錯料，諗住借「無敵」嘅人氣等自己上位，又唔諗吓老公嘅感受。「叮噹」當然收到風，但為咗頭家唔想反面，好彩「無敵」知道「阿太」想同自己發展不倫關係，換咗第二個會玩吓，因為玩完可以各自返屋企，但「無敵」直情同「阿太」講唔好搞咁多嘢，從此喺公開場合避開唔見，所以有兩個人不和嘅傳聞，但就無乜人知內情囉！
【相關文章】：
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
