雖然港隊成績近期提升不少，但整體足球發展依然緩慢。
國際邁亞密突然宣布襲港，班主碧咸更到香港拍攝宣傳片，美斯、佐迪艾巴和布斯基斯亦會到大球場獻技，球迷定必大飽眼福，不過對手香港隊呢？
香港隊直到現在是派出一隊還是聯賽明星隊，仍然是未知數，皆因下月中港隊出戰亞洲盃，希望不是最後一刻才宣布是派出怎麼隊伍迎戰，觀感真係唔好。9年前美斯到港嘅時候，其實香港足球和現在分別真係不大，依然都係漏洞多多。
港超喺2014年成立，當時有9支球隊參加，大約是5強4弱的局面。而現在的港超有11隊，爭標就有兩隊，其他亦為亞洲賽席位奮鬥，聯賽質素的確係稍有提升，但一個聯賽連最簡單升降制度依然不完善，球隊想升班就升班，降班就降班，北區講咗起碼兩至三年，直到今年先升班；九龍城大多數都係港超腳，卻留在港甲，要令人認真看待亦好難。
其實到頭來都係錢作怪，足總將資源分配喺邊？2014年後的「力爭上游，萬眾一心」計劃結果呢？每一次都係話搞好青訓，外國教練都請到香港，係有適當嘅幫助，但成人足球每個月收入連三餐都滿足唔到嘅時候，點叫人見到有未來？家長又怎放心小朋友將足球變成職業？大部分職業球員現在都要一兼多職，當心神平時已經顧在工作上，根本沒有辦法一心一意提升自己。
我所講嘅都係家常便飯，但過了9年，香港足球的成長依然緩慢，如果想更進一步，足總首先搵番一堆愛足球的人在陣高層，不然，十年後還是一樣環境。Willhappy
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
