12月15日，短暫時間有陽光，今晚有一兩陣微雨，天氣溫暖，留意明日氣溫將顥著下降，周日早上寒冷。鮑爺喺今次議息會議後「放鴿」預告減息，道指周三勁升512點兼創新高，加上新出爐經濟數據表現理想，美股隔晚繼續反覆造好，道指曾升近二百點，再刷新紀錄；美國10年期債息跌穿4厘。道指收市升158點，再創收市新高；標指升12點，距歷史高位僅距2%；納指升27點，較歷史高位仍有6%之距。

美國一直偷步炒明年減息及經濟回暖，但累積升幅唔細，標指跟納指較歷史高位亦只有一步之距，未落實減息前值搏率已大大降低，不過喺Christmas Rally情況下，回吐幅度亦有限，估計美股會喺高位徘徊。較早前已見資金開始追入細價股，羅素2000指數升2.7%，明顯跑贏大市。噚日較為好表現嘅重磅股為Tesla，公司受惠獲得法國新能源車補貼，股價升5%至251美元，暫時處於230至250美元上落區間頂部，如真正突破橫行區，將有助美股再拉升一浸。

美國10年期債息自8月以來首次跌穿4厘，曾低見3.8835厘，跌13.29個基點；息口敏感嘅2年期債息一度挫14.89個基點，報4.2776厘，之後跌勢放緩。美元顯著受壓，美滙指數曾急跌1.07%至101.77，創4個月新低。

繼美國維持利率不變後，英倫銀行及歐央行亦唔加息，並會加快徹出1.7萬億歐元嘅PEPP買債計劃。歐央行並下調明年通脹預測，由3個月前的3.2%調至2.7%，2025年維持2.1%不變。估計歐央行最快明年上半年開始減息，並跟隨美國減息步伐。相反，日本卻準備收緊貨幣政策，明年上半年加息呼聲甚高，日圓走勢亦逐步轉強。喺歐美加息期間，幾乎負利率嘅日圓為外匯Carry trade提供資金，一旦日本開始加息，料會影響環球資金流向，隨著美國減息，料借貸又重投美元懷抱。

北水無本事坐貨

至於港股，隔晚亦隨美股於ADR及夜期時段上揚，中港股市仍面對資金面薄弱問題，目前港股最大問題，駐場資本流失嚴重，外資更加係清倉走人，結果今年大部份時間由淡友空軍主導市場。中國股市一向由政策主導，但內地政策朝令夕改，正正係嚇外資，令外資信心盡失嘅主要原因。當外圍股市不停炒減息，環球股市向高位衝，中港股市則一蹶不振，外資一去不返，幾年前外資陸續撤離中港股市減少投資，仲話無有怕，由中資取回港股話語權，唔使再睇鬼子佬面色。結果港股近年越趨A股化，北水近日喺恒指16,500點淨賣出97億港元港股，其中早前高追嘅盈富基金（2800），北水低位拋售66億元，根本北水都無本事坐貨。

---

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ