12月28日，大致多雲，短暫時間有陽光，早上有一兩陣驟雨。美股仍然憧憬明年聯儲局減息，繼續聖誕老人行情，隔晚反覆做好，道指升111點再破頂，標指則向歷史高位步步進逼，收市升6點；而納指則升24點。不過假期氣氛仍濃厚下，交投淡靜，而基金樂見美股在高位年結。

Tesla憧憬第四季產能創新高，股價升1.88%收市，其股價過去四個月於200美元至250美元整固後，或有機會向上突破。但面對新能源車減價潮，其毛利率仍受壓，小心目前強勢係業績前拉高，業績後又案件重演回落狂插。

環球資金流方面，市場繼續憧憬美國聯儲局可能最快於明年3月開始減息，美匯跌破101關口，再次挑戰100關口。今年7月當美匯穿一穿100後，迎來大幅反彈，債市淡友積極沽空美債去營造恐慌，結果11月急急平倉再度轉勢。其實美國係無可能長期息口高企5%，估計明年美國GDP增長不足2%，減息救市已成為新方向。

過去兩年美國步入加息潮，以往借美元往外投資嘅資金，會迅速回流美元區，因此當美匯指數上升，新興市場普遍會受壓。當美匯回落，資金便會借入美元，再往高回報地區，即新興市場作投資，印度股市將會持續受惠。

2020年當疫情爆發，美聯儲為救市，多印5萬億美元進行QE，而美國本土根本用唔晒咁多錢，加上唔少中國資本喺美國融資，呢啲多印嘅錢最終流入中國境內進行投資。水能載舟亦能覆舟，唔少內房喺過去幾年，於美國融資逾千億美元，加加埋埋流入中國嘅資金就變成過萬億。呢批內房融資後不停高價搶地，地方政府亦因賣地賺過盤滿砵滿，花錢根本唔計成本，最近剛落成南京高鐵站，共花費300億人民幣。不過豪花背後換來債台高築，地方債務突破100萬億。

當美國面對通脹，唯有不停加息，手上嘅債務利息多得驚人，唔少之前借咗熱錢嘅企業，只有變賣國內資產，返去美國還債。內地資本由2020年時不停湧入，變成2022年不斷流出，內房無法還錢，承包商、供應商亦開始出現資金問題。內房企業唔再買地，地方政府亦出問題，結果發展商賤價賣樓，樓價下跌連業主都出事，呢啲係過度借貸嘅惡果。至於內房債爆雷後，整條產業鏈引發嘅連鎖效應，需要幾多時間去消化改善，暫時言之尚早，只希望來年有好轉。

隔晚美股反覆做好，反映中概股表現嘅金龍指數及港股ADR則變化不大。A股噚日回穩，而上周五急跌嘅騰訊（700）及網易（9999）反彈，帶動恒指噚日回升284點，成功重越5日線（16541）， 10日線（16513）及20日線（16583）。不過港股要扭轉本月跌勢，今明兩日需要升超過450點，重上17000水平，方能終結連續四個月跌市。

---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ