1月5日，大致天晴，早上天氣清涼，日間天氣略為回升。美國隔晚公布小非農就業數據超預期，反映經數仍穩健，減息預期持續降溫，美股先升後回，三大指數個別發展。道指尾市升幅收窄至只有10點；標指跟納指續別，分別再跌16點及81點。美股自上月已出現劣幣驅逐良幣現象，資金由一線股轉炒股仔，明顯升勢已接近尾聲，出現調整亦正常。不過標指升抵4,800水平後，相對回調壓力唔算太大，但高位未見金再追貨，回吐亦合理。

目前VIX處於14.13，留意15至16為短線阻力，一旦升穿可能會出現較深度調整，暫時標指回吐至4,600水平料有一定支持。雖然美股有所回調，但舊經濟股偏強，今年炒減息，銀行股有望壞帳回撥，盈利或顯著反彈，係目前較為有吸引力嘅板塊。

小非農數據一出，10年息抽升穿4%，債息升但早段美股上升，雖然中小企招聘有擴張趨勢，但整體工資只增長5.4%，低於11月嘅5.6%，企業請人但不加薪，只要薪金增幅有限，通脹仍會受控。預期今年CPI持續向下，料薪金增幅會繼續放緩。今晚將有更全面嘅大非農數據，大非農擁有更多大企業及政府職位數據，事實上在過去一年多裡，小非農因酒店及餐飲復甦偏強，相反非農因政府職位減少而偏弱。

從近日數據分析，CPI料持續回落至3%以下水平，但2.5%以下減速會非常緩慢，估計美聯儲仍會審慎處理減息，市場過份憧憬減息，變得不設實際。至於今年美股後市表現，主要都係睇減息速度，以及市場流動性。

美股持續跑贏中港股市，主要係流動性強勁，即使過去年幾處於加息周期，美國及日本仍然係全球最大熱錢供應地。熱錢於全球尋找機會。過去20年中國發展蓬勃，正正係全球大部份熱錢都流向中國。只要政府有項目招商，或是外資借到錢來中國投資，喺固定投資快速增加下，帶動起當地就業及經濟，整體經濟自然暢旺。

港股明顯未見新錢流入

目前中國面對嘅困境，正正係熱錢唔再留戀中國，喺資金流出情況下，項目沒錢投資，在缺乏資金下，經濟枯萎係正常。港股面對同樣狀況，基金去年剛剛完成大手減持後，短期亦唔會回心轉意再度入市，更何況高返？更多基金偏向低位儲貨，若然股價急升，基金更樂意高沽低買，形成港股每每反彈即惹嚟沽壓。

港股近日成交維持每日只有700至800億水平，明顯未見新錢流入，若基金低位沒有足夠貨底，休息基金再推高港股。港股暫時進入較低波幅休眠期。暫時港股已經講緊唔係夠唔夠平，抵唔抵買，係蔗渣價錢都無錢入場。雖然港股估值已夠低，料現水平有一定支持，無奈A股跌跌不休，日日拖後腿，外資去年大手沽貨，基本上來自外資嘅沽壓應去無存菁，但A股仍然日復日跌，當然係陸資持續沽貨套現。尤其年關將至，阿爺暫時未見再放水，大股東又好，小股民都好，唯有沽貨套現籌錢過年關，咁嘅情況下，中港股亦仲邊有運行。

相關文章：

港股開市｜恒指低開72點 騰訊跌1% 佐丹奴發盈喜照跌15%

---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ