1月17日，大致多雲，初時有一兩陣驟雨，日間短暫時間有陽光。國際貨幣基金組織及歐洲央行官員先後對市場減息預期降溫，美債息回升，加上大摩盈利不似預期，美股假期後受壓。隔晚道指受蘋果公司（AAPL）及波音（BA）遭拋售所拖累，曾挫近400點。收市仍跌231點；標指跌17點，納指跌25點尚算強勢。不過反映中概股表現嘅金龍指數大跌3.81%，港股於ADR及黑期再挫逾百點至近15700水平。

美股現水平值博率不足

上週五細摩等銀行業績優於預期，仍未見有資金追貨推高股價，美股明顯已有回吐壓力，隔晚大摩績後更跌4.16%，市場走貨多於買貨嘅態度更明顯。目前美股嘅表現唔可以話差，只係過去一年升幅太多，已透支部份利好因素，現水平值博率不足，資金卻步唔買貨亦好正常。

自踏入1月份，炒減息風向正改變，去年10月市場由超悲觀嘅加息至7%，發展至12月超樂觀預期今年或減息6次，但10年債息仍高企於4%，極為唔合理，加上細價股炒風起，大戶托住納指7雄，炒高細價股散貨。當細價股高位乏力回落，週二晚再有美聯儲出來放鷹，正好畀機會大戶繼續沽貨。對於坊間有人指今年美股或出現深度調整，甚至爆股災，古天后並唔認同，只要美企盈利表現交到功課，當美股調整至較值博水平，喺流動性充裕下，自然再有資金入市。

大戶加沽 期指未平倉合約勁增

至於港股未能止跌，恒指再跌350點失守16000關，隔晚ADR亦隨美股調整，今日港股定必再低開。過去兩日跌市沽空佔比例均超過20%，期指未平倉合約兩日勁增17000多張，明顯有大戶加沽。昨日再有傳聞指內地當局再限制沽A股，令港股成為「提款機」，港股遭拋售，同時亦影響投資者買貨意欲、或導致成交進一步萎縮，步入惡性循環。

過去周末內地未有放水行動，未如預期般降準減息，加上中期借貸便利（MLF）操作利率維持2.5厘不變，投資者難免失望。恒指噚日低開，早段曾力守16000關反彈，可惜16200已見阻力再掉頭，更失守16000關，加上成交未見增加，反映港股跌至現水平仍未有資金入場低吸，繼續陰乾。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ