有多少身家才可定義為「有錢人」？20年前，擁逾百萬資產已可叫「富翁」，現在坐擁過億身家叫「富豪」應該不會有異議。不過謙稱自己是賣魚佬的吳伯恩則表示，「我屬於低層人士有幸能夠步入小康之家，叫做有啲人生經歷，1億身家香港地濕濕碎啦！宜家深水埗著對爛拖鞋啲阿伯真住隨時十億八億身家，大有人在！我得兩間舖，仲有五間屋。 」由十幾歲被人欺負的工廠仔，到今時今日人稱龍躉大王，香港手持市值過億物業，《星島頭條》今次專訪龍躉大王吳伯恩，大談他的致富之路。
即睇龍躉大王過億物業：
十多歲由福建到香港打拼由工廠仔做起，「新嚟新豬肉」難免被欺負，「真係被啲飛仔恰啊，笑我！經常使我去做嘢，所以我冇耐就同啲飛仔打架，我唔夠打都要打住一半先啊！被人打到眼都腫，所以出第一份糧我即刻同我老豆講我要武館學功夫！」
藉龍躉大平賣賺第一桶金
人生轉捩點就是1996至1997年間的雪茄毒事件，「所有的魚價跌得很厲害 包括龍躉在內」由細到大都喜歡食魚的他，喜歡到因為食魚而中幾次雪茄毒，「好似重感冒咁，條腰冇力撐唔起上身，仲有隻手掂到水好似觸電咁。」但因為這些經歷，對魚類有更深了解，「龍躉叫石瓦魚，生活於海底多石頭嘅地方，唔食海草所以體內唔會含雪茄毒素。」令他想到了商機，「我發覺魚價跌咁多，呢個係機會嚟，以前太貴唔敢去試，當時就試一下。」
起初龍躉賣15元一兩，約240元一斤。以為便宜一點會有人買，怎料無人問津，最終大減至5元一兩後，生意興隆客似雲來，「呢件事就啟發到我，每一樣商品都有佢嘅底價！」
於是吳伯恩就跟魚欄以逆向方式交易， 以往由魚欄定價，現在由他定價再找數給魚欄，「將貨運畀我賣，好過喺魚排等死啦。」而這一個方式的確行得通，龍躉非常暢銷，為他賺來第一桶金， 「真係有危就有機！當時個年代樓價咁平，百幾萬一間屋，我都買得到一間屋，夠畀首期。 」
曾投資酒樓失敗離場
不過創業路上又怎會一帆風順， 曾經於太子開設鉅龍酒家，不過已於早年結業，吳伯恩坦言，開酒樓是他最錯的投資，「當時覺得街市呢行，好骯髒好辛苦，唔希望仔女將來做返呢行， 所以希望試試去投資飲食，但是做落去先發覺，原來飲食業唔係想像中咁簡單，要好有經驗先做得到。」其實他早已想定後路，就是自置物業，所以即使酒樓大計失敗告終，但店舖仍然是自己名下，現在租予海鮮餐廳，繼續做包租公收租。
供貨予各大知名酒家奠定龍躉大王稱號
之所以叫龍躉大王，是因為他供貨予各大知名酒家，雖然賣魚是辛苦，但吳伯恩認為是他最正確的投資決定，「呢個係我本行，如果我再想做其他生意而我本行唔賺錢，單靠租金收入的話，我都唔敢去投資。而呢個本行我努力去做，係一定會得到回報，有支撐令我後顧之憂。」
金融海嘯買海景特色戶自住
而這份本業的回報，就是令他在香港可以持有兩間數千呎的巨舖，五個住宅物業，同時住得越來越好，本身都是住普通分層單位，2008年金融海嘯睇準時機，進駐逾2000呎海景連天台特色戶。吳伯恩認為自己是大膽的人，「我經常都是以人人恐懼我貪婪做座右銘， 有一次見到有間地產舖，話樓上有一個複式很漂亮的，咁啱我朋友搵緊樓，我就介紹佢買，到佢入伙請我去吃飯，我一睇，嘩！正啊！ 然後我就一直等，等到金融海嘯入市。」這間屋一住已十多年，吳伯恩表示這間屋是他的風水屋，「住慣咗，都唔想搬啦。」
相關文章：
龍躉大王細女 22歲上車何文田千萬樓 從小落魚欄送貨 拒認富二代 「一直以為自己係勞動階層」
---
【上車驗樓，星島搵專家幫你手！如果你有新盤驗樓、裝修分享，請即Email：[email protected] 】
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
