高普係Will仔喺足球方面嘅啟蒙老師。美聯社。AP
高普喺星期五突然官宣將會離開利物浦，對利物浦球迷心情影響很大，佢亦撇除所有陰謀論，包括為季尾爭標打強心針、自己身體有事等等。但自問自己真係好愛佢，佢係我嘅爸爸，對足球啟蒙嘅人。
細細個10歲左右都會上阿姨屋企睇波，當時英超開始有早場，睇完早場中間有半個鐘時間，咁去睇咩好啊？就會轉咗去睇德甲，而我好記得第一場波就係多蒙特。老實講嗰場係點已經唔係好記得，但我淨係記得球迷嘅歡呼聲，一直唱《You will never walk alone》，場比賽同英超好唔同，節奏開放快上快落，我心諗邊個教練可以教到咁？
原來就係高普，每球入波佢都會激情慶祝，同英超教練坐喺教練席黑晒面，即使入波都木無表情唔同。佢每個攻勢做得好都會拍爛手掌，做得唔好就會怒斥球員，佢嘅大鳴大放植入咗我嘅心入面，足球唔單止Mind game，係可以投放情緒係入面，令我更愛足球。
同時佢都係戰術既先鋒，佢採用壓逼嘅踼法，逼到對手有氣無埞唞，每球波都唔可以順利咁組織，搶到波後就全部人衝入去禁區，左右閘都可以入波，嗰刻我真係歎為觀止，唔可以用言語形容。
高普的確係震撼到我嘅一個人，喺多蒙特同利物浦嘅成功，去到而家嘅離開，短短一篇文章點會包含晒我嘅感受，所以我只可以講一句天下無不散之筵席，我愛你爸爸。Willhappy
-----
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
