1月30日，大致多雲，早上有幾陣微雨及薄霧，天氣開始轉潮濕。聯儲局議息前，隔晚美股維持強勢，道指及標指再創歷史新高，道指升224點，標指升36點，納指亦升逾1%或172點。不過反映中概股表現的金龍指數卻跌逾1%，港股ADR收市跌逾百點，夜期跌逾200點，重返15800水平。

美科技龍頭放榜勢影響大市

微軟、Alphabet、Meta、亞馬遜及蘋果公司均於本周派成績表，呢五隻重磅科技股市值合共超過10萬億美元，升跌完全牽動美股走勢。其中，美股周二收市後公布業績嘅微軟及Alphabet股價分別升1.4%和0.9%；至於終止併購計劃的嘅亞馬遜則上揚1.3%

雖然美股升至紀錄高位，市場樂觀情緒高漲，但美股好友、星級分析員Tom Lee認為美股可能已接近上半年高峰，預期標指短線好快升至5000點，然後當市場熱情冷卻，於未來數月自高位滑落最多7%，到下半年當聯儲局開始真正減息放鬆銀根，股市將反覆回升。

內地中特股受捧 民企股捱沽

上週阿爺突然出招救市，先嚟一招降準，更有傳聞指內地將成立平準基金入市，中港股連日反彈。港股明顯見到有資金入場掃貨，但A股成交未見顯著增加，維持喺7600億水平，咁嘅成交其實係唔多合格。喺國進民退思維下，市場出現沽民企買中特股，結果上證守住2800點，反彈上2900，但以民企為主嘅創指，反彈三日後，噚日大跌3.5%，又想向下穿底。

A股入市資金不足，換馬結果拖死無問題嘅民企，龍頭紛紛被拋售，寧德時代跌2%，比亞迪跌4%，隆基綠能跌7%。保住了領導及中央重貨嘅中特股，卻犠牲股民喜愛嘅民企。

恒指倘失守15800 恐下試10日線

至於港股呢邊，恒指從14800水平以雙底模式回升，3日間反彈1400點重上16200，3日反彈9.5%，再上要睇有冇資金入場跟進，上週四、五，成交保持在1300億，尚算合格，但升抵萬六水平後入場資金高追動力要減，週一成交已縮減至1千億。

近日港股靠「中特估」概念股支撐，國家隊亦持續入市支持，恒指重上萬六關，不過恒大最終被法院下達清盤令，以及受美制裁股份再遭拋售，影響大市氣氛，最終恒指噚日僅升125點，收市報16077點，但ADR蒸發全部升幅。預計恒指今日低開重返20日線（16009）以下，並回試上周四低位15828點及15800支持，失守再下試10日線（15630）點，16000又成為即市反彈阻力。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ